ԵՐԵՎԱՆ, 21 մարտի – Sputnik. Ռուս–ուկրաինական բանակցություններում ՌԴ պատվիրակությունն արագ և բովանդակալից աշխատելու ավելի մեծ պատրաստակամություն է ցուցաբերում, քան ուկրաինականը։ Այժմ նրանց դինամիկան չի համապատասխանում իրավիճակի պահանջներին։ Նման հայտարարություն է արել ՌԴ նախագահի մամուլի քարտուղար Դմիտրի Պեսկովը, տեղեկանում ենք ՌԻԱ Նովոստիից։
Նրա խոսքով՝ բանակցություններում առաջընթացի աստիճանը, հավանաբար, այնպիսին չէ, ինչպիսին կցանկանար, և ոչ էլ այնպիսին է, ինչ պահանջում է իրավիճակի զարգացման դինամիկան:
«Մեկ անգամ ևս կրկնում եմ՝ ռուսական կողմն ավելի շատ պատրաստակամություն է ցուցաբերում արագ և բովանդակային աշխատելու, քան ուկրաինական կողմի բանակցողները»,–շեշտել է Պեսկովը։
ՌԴ նախագահի մամուլի քարտուղարի կարծիքով՝ հիմա բոլորը պետք է ազդեցություն գործեն Կիևի վրա, որպեսզի այն ավելի ճկուն դառնա։
«Ով կարող է, պետք է փորձի ազդել Կիևի վրա, որպեսզի ուկրաինական կողմն ավելի ճկուն, ավելի կառուցողական լինի։ Հիպոթետիկ հանդիպման համար տեղի ընտրությունը երկրորդական հարց է, թեև, իհարկե, մենք երախտապարտ ենք բոլոր այն երկրներին, որոնք հայտարարում են բանակցային գործընթացին աջակցելու իրենց ցանկության մասին»,–հավելել է Պեսկովը:
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողություններն ընթանում են արդեն 26–րդ օրը։