ԵՐԵՎԱՆ, 21 մարտի – Sputnik. ՀՀ վարչապետ Նիկոլ Փաշինյանն ու իր հետևորդները փորձում են դիվիդենտներ քաղել Ռուսաստանի ու Արևմուտքի միջև աննախադեպ ճգնաժամից։ Այսօր ԱԺ–ում այս մասին հայտարարեց «Հայաստան» խմբակցության պատգամավոր Վահե Հակոբյանը։
«Աշխարհաքաղաքական ներկայիս լարվածության պայմաններում իր երկրի ազգային ու պետական շահերը գիտակցող ցանկացած իշխանություն մաքսիմալ զգույշ, հավասարկշռված ու հստակ կգործեր իր բոլոր քայլերում ու հայտարարություններում։ Իսկ մենք տեսնում ենք ճիշտ հակառակը»,– ասաց նա։
Ընդդիմադիր պատգամավորը հիշեցրեց, որ ԱԳ նախարարությունը խոսնակի շուրթերով մշտապես հայտարարել է, որ Լուգանսկի ու Դոնեցկի հանրապետությունների ճանաչման հարց ՀՀ քաղաքական օրակարգում չկա։
«Հետո ՀՀ իշխանությունը սկսեց տարբեր կառույցներում մե՛կ աջակցել, մե՛կ էլ չաջակցել Ռուսաստանին։ Հիմա երկու աթոռների նստելու ու չմտածված քայլեր անելու ժամանակը չէ»,– ասաց Հակոբյանը։
Պատգամավորն Աժ ամբիոնից նաև մի քանի հռետորական հարցեր հնչեցրեց.
«Ինչպե՞ս ստացվեց, որ Ֆրանկոֆոնիայի համաժողովին մասնակցելու համար Փարիզ մեկնող ԱԳ նախարարը պատահաբար հայտնվում է Բրյուսելում ՆԱՏՕ–ի գրասենյակում։ Ո՞րն էր այդ այցի նպատակը և ինչո՞ւ նախապես հայտարարված չէր։ Ի՞նչ է անում իշխանությունը սեփական ժողովրդի մեջքի հետևում»,–ասաց Հակոբյանը։
Հիշեցնենք` մարտի 17-ին ՀՀ ԱԳ նախարար Արարատ Միրզոյանը Բրյուսելում հանդիպել էր ՆԱՏՕ-ի գլխավոր քարտուղարի առաջին տեղակալ Միրչա Ջոանայի հետ։ Ըստ պաշտոնական հաղորդագրության` քննարկվել էին տարածաշրջանային անվտանգությանը վերաբերող հարցեր։
Միրզոյանը ներկայացրել է Հայաստան - Ադրբեջան սահմանագոտում և Լեռնային Ղարաբաղում առկա իրավիճակը, Ադրբեջանի կողմից հրադադարի խախտման դեպքերը և Լեռնային Ղարաբաղում հումանիտար ճգնաժամ ստեղծելուն ուղղված գործողությունները, քաղաքացիական բնակչության նկատմամբ հոգեբանական ճնշումների գործադրման փաստերը։
ՆԱՏՕ–ի խորհրդում ունեցած ելույթում Միրզոյանն անդրադարձել էր Հայաստան-ՆԱՏՕ 30-ամյա համագործակցությանը, 2020թ․ Արցախի դեմ Ադրբեջանի իրականացրած ագրեսիայի հետևանքներին, հրատապ լուծում պահանջող հումանիտար խնդիրներին, մասնավորապես՝ Ադրբեջանում ապօրինի պահվող հայ ռազմագերիների և Լեռնային Ղարաբաղ միջազգային կազմակերպությունների մուտքի հարցերին: