ԵՐԵՎԱՆ, 20 մարտի – Sputnik. Ֆրանսիայի իշխանությունները սառեցրել են Ռուսաստանի Կենտրոնական բանկի միջոցները՝ 22 մլրդ եվրո, ինչպես նաև արևմտյան երկրների կողմից սահմանված հակառուսական պատժամիջոցների տակ հայտնված մասնավոր անձանց հաշիվներն ու անշարժ գույքը, հաղորդում Է ՏԱՍՍ-ը:
Այս մասին հայտարարել է Ֆրանսիայի էկոնոմիկայի և ֆինանսների նախարար Բրյունո լը Մերը։
«Մենք սառեցրել ենք ՌԴ ԿԲ-ի 22 միլիարդ եվրոյի ակտիվները։ Մենք սառեցրել ենք նաև մասնավոր անհատների հաշիվները ֆրանսիական հաստատություններում՝ 150 միլիարդ եվրո գումարի չափով»,-ասել է նախարարը RTL ռադիոալիքի եթերում։
Նրա խոսքով՝ Ֆրանսիայի տարածքում սառեցվել է «կես միլիարդ եվրո» ընդհանուր արժողությամբ անշարժ գույք, որը պատկանում է մոտ 30 ռուսաստանցիների։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 25–րդ օրը։