ԵՐԵՎԱՆ, 20 մարտի – Sputnik. Վաշինգտոնն Անկարային առաջարկել է ռուսական արտադրության S-400 ՀՕՊ համակարգերը հանձնել ուկրաինական զորքերին՝ Թուրքիային հինգերորդ սերնդի F-35 կործանիչի արտադրության ամերիկյան ծրագրին վերադարձնելու և Անկարայի պատժամիջոցների չեղարկման դիմաց: Տեղեկությունը հայտնում է Sky News Arabia հեռուստաալիքը՝ վկայակոչելով Պենտագոնի ներկայացուցչին։
Ավելի վաղ՝ մարտի 18-ին, Wall Street Journal-ի հետ զրույցում նման տեսակետ էր հայտնել Կենտրոնական հետախուզական վարչության նախկին օպերատիվ աշխատակից, Հարվարդի համալսարանի մեջ մտնող Intelligence Project հետախուզության ուսումնական և հետազոտական կենտրոնի տնօրեն Պաուլ Կոլբեն:
«Ի՞նչ կասեք եռակի խաղի մասին։ ԱՄՆ-ն օգնում է Թուրքիային իր S-400-ն ուղարկել Ուկրաինա ռուսական ռազմական ինքնաթիռների վրա հարձակվելու համար, իսկ թուրքերին առաջարկում է վերականգնել F-35-ի մատակարարումները»,–նման կարծիք է հայտնել փորձագետը։
Հիշեցնենք, որ Ամերիկայի Միացյալ Նահանգները Թուրքիային պաշտոնապես հեռացրել է F-35 կործանիչների ծրագրից ռուսական արտադրության S-400 զենիթահրթիռային ՀՕՊ համակարգերի ձեռքբերումից հետո։
5-րդ սերնդի գերժամանակակից F-35 կործանիչների նախագիծը համատեղ իրականացվում էր ՆԱՏՕ-ի անդամ 1 տասնյակ երկրների կողմից։ Ի սկզբանե նախագծին մասնակցում էր նաև Թուրքիան, սակայն Ռուսաստանից S-400 բարձր հեռահարության հակաօդային պաշտպանության համակարգեր գնելու պատճառով 2020թ. հուլիսին Վաշինգտոնի նախաձեռնությամբ կասեցվեց Թուրքիայի մասնակցությունը կործանիչների արտադրության ծրագրին, իսկ այդ երկրի համար արդեն արտադրված կործանիչները չմատակարարվեցին։
Ավելի վաղ Պենտագոնում հայտարարել էին, որ Թուրքիան պետք է S-400 համակարգերը Ռուսաստանին վերադարձնի, եթե Անկարան ցանկանում Է ԱՄՆ-ից ստանալ Patriot հրթիռային համակարգեր: