ԵՐԵՎԱՆ, 19 մարտի – Sputnik. ԵԱՏՄ անդամ երկրների, այդ թվում Հայաստանի բնակիչներն այսուհետ կարող են առցանց առևտրի ավելի մեծ ծավալ իրականացնել առանց մաքսատուրք վճարելու։ Որոշումն ընդունվել է Եվրասիական տնտեսական հանձնաժողովի խորհրդի երեկվա նիստում և ուժի մեջ է մտնելու 10 օր անց` մարտի 28-ից։
Որոշման համաձայն` ԵԱՏՄ անդամ չհանդիսացող երկրների հետ ապրանքների առանց մաքսատուրքերի ներմուծման շեմը ֆիզիկական անձանց համար բարձրացվել է մինչև 1000 եվրո՝ գործող 200–ի փոխարեն։
Անմաքս առևտրի ժամկետը երկարաձգվել է մինչև 2022 թվականի հոկտեմբերի 1-ը։
Առանց մաքսատուրքի ապրանք հնարավոր կլինի ԵԱՏՄ երկրներ ներմուծել, եթե ծանրոցի արժեքը չի գերազանցում 1000 եվրոն, իսկ քաշը` 31 կգ-ը։ Դրանից ավել քաշի դեպքում գնորդները ստիպված կլինեն վճարել պատվերի արժեքի 15%-ը, բայց ոչ պակաս, քան 2 եվրո` 1 կգ-ի համար:
ԵԱՏՀ խորհրդի մեկնաբանմամբ` այս որոշումը ԵԱՏՄ անդամ երկրների քաղաքացիներին թույլ կտա օտարերկրյա առցանց խանութներից անձնական օգտագործման ապրանքներ ձեռք բերել` խուսափելով դրանց հնարավոր դեֆիցիտից։
Հիշեցնենք` ՌԴ–ի դեմ կիրառված սահմանափակումների ֆոնին մտավախություն կա, որ ԵԱՏՄ անդամ երկրներում կարող է արևմտյան արտադրության ապրանքների, մասնավորապես էլեկտրոնային ապրանքների դեֆիցիտ առաջանալ։