ԵՐԵՎԱՆ, 17 մարտի – Sputnik. Ուկրաինան մինչև ռազմական գործողությունների մեկնարկը առաջարկել է Թուրքիայի ու Գերմանիայի մասնակցությամբ հանդիպում անցկացնել։ Ուկրաինան Թուրքիային տեսնում է որպես անվտանգության երաշխավոր երկիր, քանի որ Թուրքիան Սևծովյան տարածաշրջանում հեղինակություն ունի կայունություն ապահովելու համար։ Այս մասին Թուրքիայի արտգործնախարարի հետ ուկրաինական Լվովում հանդիպումից հետո հայտարարել է Ուկրաինայի արտգործնախարարԴմիտրի Կուլեբան։
Կուլեբայի թուրք գործընկեր Մևլյութ Չավուշօղլուն էլ հաստատել է Ուկրաինայի առաջարկի մասին հայտարարությունը, նշել, որ Ուկրաինան առաջարկում է կոլեկտիվ անվտանգության համաձայնագիր, որը կնախատեսի ՄԱԿ–ի 5 հիմնական երկրների (P5) և Թուրքիայի ու Գերմանիայի մասնակցությունը։
«Մոսկվայում երեկ իմ հանդիպումների ժամանակ ես տեսա, որ ՌԴ-ն դեմ չէ այս առաջարկին, և նրանք, հնարավոր է` ընդունեն դա։ Եթե այս հարցերում համաձայնություն լինի, հավանականություն կա, որ երկու երկրների ղեկավարները կհանդիպեն»,-հայտարարել է Թուրքիայի արտգործնախարարը։
Նշենք, որ երկու երկրների արտգործնախարարներն Ուկրաինայի առաջարկի մասին խոսել են, երբ լրագրողները հարցրել ենFinancial Times միջազգային գործակալության` նախօրեին հրապարակած հոդվածի մասին։ Այնտեղ նշվում էր, որ Ուկրաինայի և Ռուսաստանի միջև 15 կետից բաղկացած համաձայնության սևագիր տարբերակ կա։
Financial Times-ը, հղում անելով իր աղբյուրներին, գրել էր, որ ըստ համաձայնագրի՝ Կիևը կհրաժարվի ՆԱՏՕ-ին միանալու իր հավակնություններից և կխոստանա «չհյուրընկալել» օտարերկրյա ռազմակայաններ կամ սպառազինություն։
Ուկրաինայի ԱԳՆ-ն հայտարարել է, որ FT հրապարակածը չի ներկայացնում Ուկրաինայի պահանջները, դրանք միայն ռուսական կողմի ցանկություններն են ու չեն կարող մեկնաբանվել որպես Ուկրաինայի ցանկություններ։
Հիշեցնենք՝ Թուրքիայի ԱԳՆ Մևլութ Չավուշօղլուն երեկ այցելել էր Ռուսաստան, հանդիպել ՌԴ ԱԳՆ Սերգեյ Լավրովին։