ԵՐԵՎԱՆ, 17 մարտի - Sputnik. ՀՀ կառավարության այսօրվա նիստում ընդունված որոշմամբ հայաստանյան քաղաքական 4 ուժեր 520 մլն 733 հազար դրամ գումար կստանան պետական բյուջեից։
Կառավարությունը որոշումն ընդունեց առանց քննարկման ու զեկուցման, բայց գործադիրի պաշտոնական կայքում հրապարակված նախագծից պարզ է դառնում, որ նշված գումարը բաշխվելու է 4 ուժերի` 2 խորհրդարանական և 2 արտախորհրդարանական կուսակցությունների միջև։
Որոշման համաձայն, ամենամեծ գումարը` 268 մլն 309 հազար դրամ կստանա «Քաղաքացիական պայմանագիր» կուսակցությունը, 163 մլն 221 հազար` «Հայաստան» դաշինքը, 50 մլն 444 հազար` ԲՀԿ–ն, 38 մլն 758 հազար` «Հանրապետություն» կուսակցությունը։
Նշենք, որ այս հատկացումները նախատեսված են ՀՀ պետական բյուջեով ու իրականացվում են «Կուսակցությունների մասին» ՀՀ օրենքով, որով նախատեսվում է պետական աջակցություն ցուցաբերել ՀՀ ազգային ժողովի ընտրություններում 3 և ավելի տոկոս ձայն հավաքած կուսակցություններին ու կուսակցությունների դաշինքներին։
Հիշեցնենք` խորհրդարանական ընտրություններում 3 տոկոսի շեմը հաղթահարել էին միայն վերոհիշյալ 4 քաղաքական ուժերը։