ԵՐԵՎԱՆ, 16 մարտի – Sputnik. Ուկրաինայում Ավստրիայի կամ Շվեդիայի օրինակով սեփական բանակի հետ ապառազմականացված երկիր ստեղծելու գաղափարը կարող է դիտարկվել որպես փոխզիջում, հայտարարել է ՌԴ նախագահի մամուլի քարտուղար Դմիտրի Պեսկովը:
«Սա տարբերակ է, որն այժմ իսկապես քննարկվում է, և որը կարող է դիտարկվել որպես փոխզիջում»,–լրագրողներին ասել է Պեսկովը:
Նա չի մեկնաբանել այն հարցը, թե կարելի՞ է Դոնբասի պաշտպանության և Ռուսաստանին փրկելու Մեծ հայրենական ռազմական հատուկ գործողություն անվանել այն, ինչ այժմ Ռուսաստանն անցկացնում է Ուկրաինայում` «այդ արտոնությունը» թողնելով քաղաքագետներին ու պատմաբաններին։
«Ինձ հայտնի չէ, որ դա քննարկվի Կրեմլում։ Իմ անձնական զգացողություններն այս համատեքստում ոչ մի դեր չեն խաղում»,–ասել է Պեսկովը։
Ավելի վաղ ՌԴ պատվիրակության ղեկավար, նախագահի օգնական Վլադիմիր Մեդինսկին հայտնել է, որ Կիևը բանակցություններում առաջարկում է Ուկրաինայում ստեղծել ապառազմականացված պետության ավստրիական կամ շվեդական տարբերակ, որն ունի իր սեփական բանակը:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 21–րդ օրը։