ԵՐԵՎԱՆ, 16 մարտի – Sputnik. ԱՄՆ նախագահ Ջո Բայդենը հայտարարել է, որ ԱՄՆ-ն այս շաբաթ Ուկրաինային 1 միլիարդ դոլարի ռազմական օգնություն կտրամադրի։
Ինչպես հայտնում է ՌԻԱ Նովոստին` ամերիկյան ռազմական աջակցությունը ներառում է 800 հակաօդային պաշտպանության համակարգեր, 9000 հակատանկային համակարգեր, անօդաչու թռչող սարքեր, 7000 հրետանային զինատեսակներ և 20 միլիոն միավոր զինամթերք։
Հատկանշական է, որ Սպիտակ տան ղեկավարն այս հայտարարությունն արել է Ուկրաինային օգնելու մասին ԱՄՆ Կոնգրեսում Վլադիմիր Զելենսկու առցանց ելույթից հետո։ Բայդենն Ուկրաինայի նախագահի ելույթը համոզիչ էր անվանել ու շնորհակալություն հայտնել դրա համար։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 21–րդ օրը։