ԵՐԵՎԱՆ, 15 մարտի – Sputnik. ԱՄՆ-ի ղեկավարության ներկայացուցիչները, որոնք հայտնվել են ՌԴ-ի պատժամիջոցների ցուցակում, Ռուսաստան այցեր չեն ծրագրել, այնտեղ հաշիվներ չունեն, հայտնել Է Սպիտակ տան պաշտոնական ներկայացուցիչ Ջեն Փսակին, տեղեկանում ենք ՌԻԱ Նովոստիից։
Հայտնել էինք, որ Ռուսաստանն անհատական պատժամիջոցներ է սահմանել ԱՄՆ-ի ղեկավարների և նրանց հետ կապված անձանց նկատմամբ:
Ի պատասխան Փսակին հայտարարել է, որ վերոհիշյալ ցանկից ոչ ոք չի պլանավորել տուրիստական նպատակներով Ռուսաստան ուղևորություններ կատարել, չունի բանկային հաշիվներ, որոնց հասանելիությունը կարելի է արգելափակել:
«Այնպես որ, մենք առաջ ենք շարժվելու»,–հավելել է նա:
Հիշեցնենք, որ Ռուսաստանի ԱԳՆ-ի պաշտոնական հայտարարության մեջ ասվում էր, որ մարտի 15-ից ռուսական «սև ցուցակում» փոխադարձության հիմքով ներառվում են նախագահ Ջո Բայդենը, պետքարտուղար Էնթոնի Բլինկենը, պաշտպանության նախարար Լլոյդ Օսթինը և Շտաբների պետերի միացյալ կոմիտեի նախագահ Մարկ Միլին, ինչպես նաև մի շարք գերատեսչությունների ղեկավարներ և ամերիկացի հայտնի գործիչներ։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 20–րդ օրը։