ԵՐԵՎԱՆ, 15 մարտի – Sputnik. Ռուսաստանի և Թուրքիայի ԱԳ նախարարներ Սերգեյ Լավրովը և Մևլութ Չավուշօղլուն մարտի 16-ին Մոսկվայում կքննարկեն առևտրատնտեսական համագործակցության զարգացումը պատժամիջոցների ճնշման աճի պայմաններում, տեղեկանում ենք Ռուսաստանի ԱԳՆ-ից:
«Հանդիպման ընթացքում լուրջ ուշադրություն կդարձվի խստացող պատժամիջոցների պայմաններում երկկողմ առևտրատնտեսական համագործակցության ընդլայնման հարցերի քննարկմանը, փոխգործակցության ոլորտում նորարարությունների և բարձր տեխնոլոգիաների, կորոնավիրուսային վարակի դեմ պայքարի ոլորտում»,–ասված է գերատեսչության հայտարարության մեջ:
Նշվում է նաև, որ 2020 թվականի համեմատ, 2021 թվականին ռուս-թուրքական առևտրի շրջանառությունն աճել է 57 տոկոսով (մինչև 33 մլրդ դոլար):
«Բանակցություններում արծարծվելու է այնպիսի փոխշահավետ նախագծերում համատեղ աշխատանքը, ինչպիսիք են «Աքքույու» ԱԷԿ-ի կառուցումը և «Թուրքական հոսք» գազատարի շահագործումը»,–նշված է հայտարարության մեջ։
Նախարարները կանդրադառնան նաև Թուրքիայում ռուսաստանցիների համալիր անվտանգության ապահովման թեմաներին. 2021 թվականին թուրքական առողջարաններ են այցելել Ռուսաստանի ավելի քան 4 միլիոն քաղաքացիներ:
Հիշեցնենք, որ Սերգեյ Լավրովն այսօր հանդիպել էր Իրանի արտգործնախարար Հոսեյն Ամիր Աբդոլլահիանի հետ։ Հանդիպման ավարտից հետո Լավրովը հայտնել էր, որ հանդիպման ընթացքում մեծ ուշադրություն է դարձվել առևտրատնտեսական համագործակցությանը:
Կողմերն ապրանքաշրջանառության կայուն աճ են արձանագրել։ Չնայած պահպանվող ոչ լեգիտիմ պատժամիջոցներին ու կորոնավիրուսի համավարակին, անցյալ տարի այն աճել է գրեթե 82 տոկոսով ու գերազանցել 4 մլրդ դոլարի նշագիծը: