ԵՐԵՎԱՆ, 15 մարտի – Sputnik. ՀՀ սահմաններին որևէ տեղ հակառակորդի առաջխաղացման խնդիր չկա։ Այսօր ԱԺ–ում լրագրողների հետ զրույցում ասաց ՀՀ պաշտպանության փոխնախարար Արման Սարգսյանը` անդրադառնալով Սյունիքի Ներքին Հանդ գյուղի տարածքում ադրբեջանական զինուժի առաջխաղացման մասին լուրերին։
«Հայաստանում որևէ բան հնարավոր չէ թաքցնել։ Եթե նման խնդիր լինի, ՊՆ–ն իր պաշտոնական կայքով կներկայացնի` առանց բացառության»,– ասաց նա։
Հիշեցնենք` Սյունիքի մարզի Ներքին Հանդի գյուղապետ Խաչիկ Բաղդասարյանը Sputnik Արմենիայի հետ զրույցում ասել էր, որ ադրբեջանցի զինվորականները նախկինում տեղակայված են եղել խորհրդային տարիների սահմանագծի երկայնքով, իսկ այժմ նրանք առաջ են շարժվել՝ դիրքավորվելով հին գյուղի մոտ, որտեղ գյուղի ներկայիս արոտավայրերն են ու խմելու ջրի աղբյուրը։
«Երևի 20-25 հոգի են»,- ասել էր Բաղդասարյանը։
Գյուղի բնակիչներից մեկն էլ Sputnik Արմենիային պատմել է, որ ադրբեջանցի զինվորականները գյուղի տարածում շուրջ800-1000 մետր առաջ են եկել։