ԵՐԵՎԱՆ, 14 մարտի – Sputnik. ՀՀ առողջապահության նախարար Անահիտ Ավանեսյանն այսօր լրագրողների հետ ճեպազրույցում պատասխանեց նաև նախարարությունում առաջիկայում սպասվող կադրային փոփոխությունների, մասնավորապես` նախարարության աշխատակազմի ղեկավար Վարդուհի Գրիգորյանին փոխնախարարի պաշտոնում նշանակելու ու նախկին նախարար Արսեն Թորոսյանի մտերիմ, նախարարի խորհրդական Յակով Ասատրյանին, ի հեճուկս Թորոսյանի ջանքերի, այդ պաշտոնում չնշանակելու մասին լուրերին։
«Վարդուհի Գրիգորյանն առողջապահության նախարարությունում է աշխատում, կարծեմ, վերջին 17 տարիների ընթացքում։ Առաջատար մասնագետից երկար տարիների ընթացքում հասել է դեղերի քաղաքականության վարչության պետի պաշտոնին, այնուհետև նշանակվել է աշխատակազմի ղեկավար, որից հետո փոխվել է պաշտոնի անունը` գլխավոր քարտուղար»,– ասաց նա` ըտ էության չհերքերով ու չհաստատելով Վարդուհի Գրիգորյանի նշանակման մասին լուրերը։
Ավանեսյանը միայն հայտնեց, որ փոխնախարարի պաշտոնը ներկայում թափուր է, ու հնարավոր թեկնածուների շուրջ քննարկումներ են ընթանում։
Ինչ վերաբերում է նախկին նախարար Արսեն Թորոսյանի մտերիմը համարվող նախարարի խորհրդական Յակով Ասատրյանին այդ պաշտոնում նշանակելուն, Ավանեսյանը միանշանակ հայտարարեց, որ վերջինը շարունակելու է զբաղեցնել խորհրդականի պաշտոնը։
Նշենք, որ մամուլի հրապարակումների համաձայն, առողջապահության նախկին նախարար Արսեն Թորոսյանը փորձում է փոխնախարարի պաշտոնում առաջադրել իր մտերիմ Յակով Ասատրյանին, իսկ գործող նախարար Անահիտ Ավանեսյանը` Վարդուհի Գրիգորյանին։