ԵՐԵՎԱՆ, 14 մարտի – Sputnik. Մարդու իրավունքների նախկին պաշտպան Արման Թաթոյանը կարծում է, որ այն, ինչ ադրբեջանական իշխանություններն անում են Արցախի նկատմամբ, մտածված քաղաքականություն է։ Թաթոյանը ֆեյսբուքյան իր էջում է նման գրառում արել` անդրադառնալով վերջին իրադարձություններին։
Թաթոյանը հիշեցրել է, որ ադրբեջանցիները մարտի 8-ից դիտավորությամբ վնասել են ՀՀ–ից Արցախ մտնող գազատարը և թույլ չեն տալիս վերանորոգել:
«Գազից, ջեռուցումից ու տաք ջրից (մինչև -5 աստիճան ցրտի պայմաններում) մտադրված զրկել են 100 000-ից ավելի խաղաղ բնակիչների, հիվանդանոցներ, դպրոցներ, մանկապարտեզներ, երեխաների ու տարեցների` առաջացնելով հումանիտար աղետ և մարդկանց իրավունքների զանգվածային խախտումներ: Կրակում են Խրամորթ, Կարմիր Շուկա և մյուս գյուղերի վրա, թիրախավորում են մարդկանց ու նրանց տները, դպրոցներ: Ընդ որում, կրակում են ինչպես փոքր, այնպես էլ խոշոր տրամաչափի զինատեսակներով ու կրակում են թիրախային»,–գրում է նա։
Թաթոյանի խոսքով` ադրբեջանցիներն Արցախի գյուղերի հարևանությամբ կուտակել են ծանր ռազմական տեխնիկա, այդ թվում` տանկեր, և այդ ամենն անում են ցուցադրաբար: Բացի այդ, նախկին ՄԻՊ-ը հիշեցնում է, որ ադրբեջանական ԶՈւ–երի տեղակայման դիրքերից բարձրախոսներով ուժի սպառնալիքով հայերենով ահաբեկում են խաղաղ բնակչությանը, որ լքեն իրենց հայրենի բնակավայրերը:
Այս ամենը, ըստ նրա, ոչ թե իրարից կտրված արարքներ են, այլ միասնական քաղաքականության, մեկ միասնական շղթայի բաղկացուցիչ մասեր են. ատելության ու թշնամանքի քաղաքականություն, որ ունի էթնիկ ու կրոնական հիմքեր:
«Էլ ինչպե՞ս են լինում ցեղասպան քաղաքականությունը և էթնիկ զտումները: Տիպիկ քրեորեն պատժելի միջազգային հանցավոր վարքագիծ»,–հավելել է Թաթոյանը։
Նա հայտնել է նաև, որ իր այս հաղորդումներն ուղարկվում են միջազգային կառույցներին` այս շեշտադրումները ներառյալ:
Հիշեցնենք, որ մարտի 8-ից Հայաստանի Հանրապետությունից Արցախ եկող գազատարի վնասման հետևանքով Արցախի ամբողջ տարածքը զրկված է գազամատակարարումից։ Գազատարի վնասված հատվածը գտնվում է ադրբեջանական զինված ուժերի վերահսկողության տակ։