ԵՐԵՎԱՆ, 13 մարտի – Sputnik. Ռուսաստանը պետական պարտքի իր պարտավորություններից չի հրաժարվում, վճարելու է ռուբլով այնքան ժամանակ մինչև արևմտյան երկրները չապասառեցնեն ոսկեարժութային պահուստները, «Ռոսիա 1» հեռուստաալիքի եթերով հեռարձակվող «Մոսկվա. Կրեմլ. Պուտին» հաղորդման ընթացքում հայտարարել է ՌԴ ֆինանսների նախարար Անտոն Սիլուանովը։ Նրա խոսքերն է մեջբերում ՌԻԱ Նովոստին։
«Մեր ոսկեարժութային պահուստները, այդ թվում Ազգային բարեկեցության հիմնադրամը, սառեցված են։ Մենք մեր պարտավորությունների, այդ թվում պարտքային պարտավորությունների կատարման հետ կապված խնդիրների առաջ ենք կանգնել։ Ինձ թվում է` արդարացի է, երբ մենք ասում ենք, որ չենք հրաժարվում պետական պարտավորությունները կատարել, դրանք կվճարենք ռուբլով այնքան ժամանակ, մինչև մեր ոսկեարժութային պահուստները կապասառեցվեն», – ասել է Սիլուանովը։
Բացի այդ, նախարարը նշել է, որ Արևմուտքը ճնշում է գործադրում Չինաստանի վրա, որպեսզի այն սահմանափակի Ռուսաստանի հասանելիությունը յուանով իր պահուստներին` բացատրելով, որ ոսկեարժութային պահուստների մի մասը չինական արժույթով է։
«Մենք տեսնում ենք, ինչ ճնշում է գործադրվում Չինաստանի վրա արևմտյան երկրների կողմից` Չինաստանի հետ փոխադարձ առևտուրը սահմանափակելու համար», – նշել է նա` հույս հայտնելով, որ Չինաստանի հետ գործընկերային հարաբերությունները թույլ կտան ոչ միայն պահպանել համագործակցության բարձր մակարդակը, այլև բազմապատկել այն, այս պայմաններում, երբ արևմտյան շուկաները փակվում են։
Հիշեցնենք նաև, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններն ընթանում են արդեն 18–րդ օրը։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։