ԵՐԵՎԱՆ, 13 մարտի – Sputnik. Անցումային փուլում գտնվող հասարակության համար շատ կարևոր են պետական ինստիտուտները։ Այս մասին երդմնակալության արարողության ժամանակ ասաց ՀՀ նախագահի լիազորությունները ստանձնած Վահագն Խաչատուրյանը։
«Հանրային կառավարման արդյունավետությունը, պետական համակարգերի փոխհամագործակցությունը խիստ կարևոր են։ Եթե նրանք գործում են սահմանադրությունից դուրս, պետությունը դառնում է մի խումբ մարդկանց շահերը սպասարկող։ Ցավոք սրտի, այս ամենի ականատեսը ու մասնակիցը ոչ վաղ անցյալում եղել ենք մենք», - ասաց Խաչատուրյանը։
Նրա խոսքով` 2018-ի հեղափոխությունից առաջ Հայաստանում տիրող մթնոլորտը հոռետեսություն էր ներարկել մարդկանց մեջ։
Նախագահի խոսքով՝ աշխարհը արագ է փոխվում և պետք է հաշտվել դրա հետ։
«Մենք ականատեսն ենք արագ փոփոխվող աշխարհի համակարգերի, այսօր մեզ ավելի քան երբևէ պետք է կայունություն և միաբանություն», - ասաց նախագահը։
Ըստ Խաչատուրյանի երկրին անհրաժեշտ են հեռանկարային զարգացման ծրագրեր, իրավիճակն իրատեսորեն գնահատելու կարողություն, տարածաշրջանային համագործակցություն։
«Ժամանակն է զարգացնել անվտանգության համակարգը և տնտեսությունը։ Հայաստանի ապագան բարձր տեխնոլոգիական տնտեսության, հնարավորությունների և մարդկանց գիտելիքների մեջ է։ Կրթությունը, գիտությունն ու մշակույթը միշտ եղել և մնում են հայ ժողովրդի հաջողության գրավականը», - նշեց նա։
Խաչատուրյանի խոսքով՝ հետպատերազմյան շրջանում մեզ անհրաժեշտ է համբերություն, հույս, համախմբվածություն, որպեսզի միասին կերտենք նոր Հայաստան և երաշխավորենք Արցախի անվտանգությունը։
Վահագն Խաչատուրյանը նշեց, որ պետք է մշակել հեռանկարային ծրագրեր, տարածաշրջանային համագործակցությունն ընդլայնել և վերացնել սահմանափակումները։
Նշենք, որ այս պահին Երևանի Կ․ Դեմիրճյանի անվան մարզահամերգային համալիրում ընթանում է ՀՀ 5–րդ նախագահի երդմնակալության արարողությունը։
Վահագն Խաչատուրյանը ՀՀ նախագահ է ընտրվել մարտի 3-ին Հայաստանի Ազգային ժողովի իշխող խմբակցության 71 պատգամավորների միաձայն քվեարկությամբ։