ԵՐԵՎԱՆ, 12 մարտի – Sputnik. Ռուսաստանի նախագահ Վլադիմիր Պուտինը Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի հետ հեռախոսազրույցում քննարկել է Ուկրաինայի իրադրությունը, հաղորդում է Կրեմլի մամուլի ծառայությունը:
Ռուսական պետության ղեկավարը, մասնավորապես, մատնանշել է Կիևի ուժայինների կողմից միջազգային հումանիտար իրավունքի նորմերի խախտման բազմաթիվ փաստեր և կոչ արել ազդել Կիևի վրա՝ Ուկրաինայում միջազգային հումանիտար իրավունքի խախտումները դադարեցնելու համար: Նրա խոսքով ՝ Ուկրաինայի ազգայնական գումարտակները պարբերաբար խափանում են բնակչությանը փրկելու գործողությունները։
Ռուսաստանի նախագահն իր գործընկերներին տեղեկացրել է Դոնբասի պաշտպանության գործողությունների անցկացման շրջաններում հումանիտար իրավիճակի մասին: Նա մանրամասն պատմել է վերջին օրերին Ռուսաստանի և Ուկրաինայի բանակցությունների մասին։
Զրույցի արդյունքում առաջնորդները պայմանավորվել են շարունակել շփումները ուկրաինական խնդրի շուրջ և քննարկել են ռուսական պահանջների իրագործման շուրջ մշակվող պայմանավորվածությունների հետ կապված հարցեր:
Շոլցն ու Մակրոնն իրենց հերթին նշել են Ուկրաինայում կրակի դադարեցման և դիվանագիտական լուծում գտնելու անհրաժեշտությունը, հաղորդում է կանցլերի մամուլի ծառայությունը:
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններն ընթանում են արդեն 17–րդ օրը։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։