ԵՐԵՎԱՆ, 12 մարտի – Sputnik. ՀՀ և Թուրքիայի արտգործնախարարներ Արարատ Միրզոյանն ու Մևլութ Չավուշօղլուն վերահաստատել են երկու կողմերի պատրաստակամությունը շարունակել նորմալացման գործընթացը հարաբերությունների հաստատման և սահմանների բացման նպատակով՝ առանց որևէ նախապայմանի։ Այս մասին Միրզոյանը հայտարարեց այսօր Անթալիայում Չավուշօղլուի հետ հանդիպումից անմիջապես հետո։
Հայտնել ենք, որ այսօր Անթալիայում տեղի ունեցան Հայաստանի և Թուրքիայի արտգործնախարարների բանակցությունները։ Հանդիպումը տևել է շուրջ 30 րոպե։
«Մեր երկու ներկայացուցիչներն աշխատում են այդ ուղղությամբ, հուսով եմ, որ մոտ ապագայում դրական արդյունքներ կտեսնենք։ Ուրախ եմ տեսնել, որ տարածաշրջանի բոլոր ժողովուրդներն ու պետությունները փորձում են կառուցել խաղաղություն և կայունություն մեր տարածաշրջանում։ Եվ ուզում եմ ասել, որ Հայաստանի կողմից տարածաշրջանում խաղաղություն ունենալու այդ պատրաստակամությունը կա»,–ասաց Միրզոյանը։
Հավելենք, որ Թուրքիայի ԱԳ նախարար Մևլութ Չավուշօղլուն Միրզոյանի հետ բանակցությունները կառուցողական և չափազանց արդյունավետ էր անվանել։
Հիշեցնենք` ՀՀ արտգործնախարար Արարատ Միրզոյանը մասնակցում է մարտի 11-13-ն Անթալիայում անցկացվող դիվանագիտական 2-րդ համաժողովին։
Անթալիայում դիվանագիտական համաժողովն այս տարի անցկացվում է երկրորդ անգամ՝ Թուրքիայի նախագահի հովանու ներքո։ Համաժողովը գլոբալ և տարածաշրջանային հարցերի շուրջ կարծիքների փոխանակման, ինչպես նաև արտաքին քաղաքական առանցքային խնդիրների լուծումների որոնմանն ուղղված նախաձեռնություն է: