ԵՐԵՎԱՆ, 12 մարտի – Sputnik. Ամենայն հայոց կաթողիկոս Գարեգին 2–րդը կմասնակցի ՀՀ 5-րդ նախագահ Վահագն Խաչատուրյանի երդմնակալության արարողությանը: Այս մասին Sputnik Արմենիային հայտնեց Մայր աթոռ Սուրբ Էջմիածնի հասարակայնության հետ կապերի պատասխանատու Տեր Եսայի քահանա Արթենյանը։
Հոգևորականն ընդգծեց, որ Մայր աթոռը հրավեր է ստացել, և Հայ եկեղեցու առաջնորդը կմասնակցի արարողությանը:
Ավելի վաղ հայտնի էր դարձել, որ հրավերներ ուղարկվել են նաև ՀՀ նախկին նախագահներին, սակայն նրանցից ոչ մեկը չի մասնակցի այդ արարողությանը։
Հիշեցնենք` ԱԺ–ն Խաչատուրյանին ՀՀ նախագահ ընտրեց մարտի 3-ին։ Ըստ Սահմանադրության` նա պաշտոնը պետք է ստանձնի 10 օր անց ԱԺ հատուկ նիստում։
Խաչատուրյանի երդմնակալության համար ԱԺ հատուկ նիստը կանցկացվի մարտի 13-ին Կարեն Դեմիրճյանի անվան մարզահամերգային համալիրում: