ԵՐԵՎԱՆ, 11 մարտի – Sputnik. ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ դաշինքի անդամ երկրների կողմից Ռուսաստանի դեմ պատժամիջոցների սահմանումը Ուկրաինային ուղղված աջակցություն է, բայց նաև ընդգծել է, որ այդ միջոցներն ազդում են բոլորի վրա: Տեղեկությունը հայտնում է ՌԻԱ Նովոստին։
«Մենք աննախադեպ պատժամիջոցներ ենք սահմանում Ռուսաստանի դեմ... Ոչ ոք չի ցանկանում այդ պատժամիջոցները, դրանք ազդում են ամբողջ աշխարհի վրա` ներառյալ այն երկրները, որոնք կիրառում են այդ պատժամիջոցները։ Բայց միևնույն ժամանակ մենք պարտավոր ենք արձագանքել»,– ասել է նա՝ ելույթ ունենալով Անթալիայի դիվանագիտական համաժողովում և պատասխանելով այն հարցին, թե կարող են արդյոք Ռուսաստանի դեմ կոշտ պատժամիջոցները վերականգնել խաղաղությունը։
Հիշեցնենք` արևմտյան երկրները հակառուսական պատժամիջոցներ են սահմանել Ուկրաինայի իրավիճակի պատճառով։ Պատժամիջոցները մասնավորապես առնչվում են ՌԴ խոշորագույն բանկերին, այդ թվում՝ Սբերբանկին ու ՎՏԲ-ին։ Եվրամիությունը, ԱՄՆ-ը, Կանադան և մի շարք այլ երկրներ փակել են իրենց օդային տարածքը ռուսական ինքնաթիռների համար. մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունը։ Պատժամիջոցներ են սահմանվել բարձրտեխնոլոգիական արտադրանքի մատակարարումների համար։
Բացի այդ, ԱՄՆ-ն մարտի 8-ին արգելք է սահմանել ռուսական նավթի, հեղուկացված բնական գազի և ածխի ներկրման վրա: Մեծ Բրիտանիան հայտարարել է, որ 2022 թվականի վերջին կդադարեցնի Ռուսաստանից նավթի և նավթամթերքի ներկրումը: