ԵՐԵՎԱՆ, 11 մարտի – Sputnik. Թուրքիայի նախագահի մամուլի քարտուղար Իբրահիմ Քալընը հայտարարել է, որ հնարավոր է` Ռուսաստանի և Ուկրաինայի նախագահները` Վլադիմիր Պուտինն ու Վլադիմիր Զելենսկին, մոտ ապագայում հանդիպեն։
Նա նշել է, որ ռազմական գործողությունների մեկնարկից ի վեր Թուրքիայի նախագահ Ռեջեփ Թայիփ Էրդողանը մի քանի անգամ հեռախոսով խոսել է ռուս և ուկրաինացի գործընկերների հետ և Անկարան ձգտում է ակտիվ դեր խաղալ բանակցությունների կազմակերպման գործում։
«Ուկրաինական կողմը ցանկանում է ռուս գործընկերոջ հետ ռազմավարական մակարդակի հանդիպումներ ունենալ։ Եթե անկեղծ լինենք, չգիտեմ` դա երբ կլինի, չգիտեմ, թե Ռուսաստանը երբ իրեն բավարար հանգիստ կզգա, որպեսզի այդպիսի բանակցություններ սկսի։ Ռուսաստանի արտգործնախարար Սերգեյ Լավրովն ասաց, որ նախագահ Պուտինը չի խուսափում Զելենսկու հետ հանդիպումից։ Ես սա լավ նշան եմ համարում։ Հիմք կա կարծելու, որ մոտ ապագայում այդ հանդիպումը կլինի»,- Sol TV–ն մեջբերում է Քալընի ասածը։
Նա նշել է, որ հանդիպումը ուշ կամ շուտ լինելու է, բայց Թուրքիան շարունակելու է բանակցությունները հեշտացնողի դեր կատարել։
«Այս պատերազմը վերջ տալու վերջնական որոշումը Պուտինինն է։ Ի վերջո, Վլադիմիր Պուտինն է այն մարդը, որ վերջանական խոսք է ասելու այս հարցում»,–հավելել է Քալընը։
Հիշեցնենք՝ մարտի 10-ին Թուրքիայի Անթալիա քաղաքում միջազգային դիվանագիտական ֆորումի շրջանակում եռակողմ հանդիպում ունեցան Թուրքիայի, Ռուսաստանի և Ուկրաինայի արտգործնախարարները։ Հանդիպման ավարտին արված երկկողմ հայտարարություններից պարզ դարձավ, որ կողմերը հրադադար հաստատելու շուրջ համաձայնության չեն եկել։