ԵՐԵՎԱՆ, 10 մարտի – Sputnik. Ռուսաստանը Եվրոպայի խորհրդից դուրս կգա ընթացիկ ֆինանսական տարվա վերջին։ Տեղեկությունը ՌԻԱ Նովոստիին է հայտնել Դաշնության խորհրդի փոխխոսնակ Կոնստանտին Կոսաչևը:
Նրա խոսքով՝ ԵԽ-ից դուրս գալը իրականացվում է ԵԽ Կանոնադրության 7-րդ հոդվածի հիման վրա՝ անդամ պետության նախաձեռնությամբ, երբ այդ մասին պաշտոնապես տեղեկացվում է ԵԽ գլխավոր քարտուղարին։ Անդամակցության դադարեցումը տեղի է ունենում ընթացիկ ֆինանսական տարվա վերջում, եթե ծանուցումն արվել է այս տարվա առաջին 9 ամիսների ընթացքում: «Եթե ծանուցումն ուղարկվել է ֆինանսական տարվա վերջին երեք ամիսների ընթացքում, ապա անդամակցության դադարեցումը տեղի է ունենում հաջորդ ֆինանսական տարվա վերջում»,– պարզաբանել Է նա:
Ընդ որում` դենոնսացիան (պետության կողմից որևէ գործողություն դադարեցնելու կամ համաձայնագրից հրաժարվելու հայտարարություն. խմբ) համապատասխան երկրին չի ազատում Մարդու իրավունքների եվրոպական կոնվենցիայի պարտավորություններից ցանկացած գործողության համար, որը կարող էր նման պարտավորությունների խախտում լինել և կարող էր կատարվել նրա կողմից մինչև դենոնսացիայի ուժի մեջ մտնելը»,– մեջբերել է սենատորը կոնվենցիայի դրույթները:
Նշենք, որ Եվրոպայի խորհրդից դուրս գալուց հետո ռուսաստանցիները չեն կարողանա դիմել Մարդու իրավունքների եվրոպական դատարան։ Սակայն, ըստ Դաշնային խորհրդի սահմանադրական օրենսդրության և պետական շինարարության կոմիտեի ղեկավար Անդրեյ Կլիշասի, Եվրոպայի խորհրդից Ռուսաստանի դուրս գալը ոչ մի կերպ չի ազդի ռուսաստանցիների իրավունքների վրա:
«Մեր ստանդարտները շատ ոլորտներում ավելի բարձր են, քան նախատեսված է Եվրոպայի խորհրդի փաստաթղթերում»,– ասել է սենատորը:
Նա նաև կոչ է արել Ռուսաստանի քաղաքացիներին ավելի հաճախ դիմել տեղական դատարաններ, այդ թվում՝ ՌԴ Սահմանադրական դատարան:
Ռուսաստանի արտաքին գործերի նախարարությունն այսօր է հայտարարել, որ մտադիր է դադարեցնել ԵԽ անդամակցությունը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։