ԵՐԵՎԱՆ, 10 մարտի – Sputnik. Ռուսաստանի կառավարությունը մի շարք ապրանքների արտահանման արգելք է սահմանել մինչև 2022 թվականի դեկտեմբերի 31-ը: Այդ ցանկում ներառվել են մարդատար ավտոմեքենաներ, ինքնաթիռներ, անօդաչու թռչող սարքեր։
Ինչպես հաղորդում է ՌԴ կառավարության մամուլի ծառայությունը, որոշումն ընդունվել է «Ռուսաստանի անվտանգության ապահովման նպատակով հատուկ տնտեսական միջոցների կիրառման մասին» նախագահի հրամանի հիման վրա։
«Ցանկում ներառված են տեխնոլոգիական, հեռահաղորդակցման միջոցներ, բժշկական սարքավորումներ, տրանսպորտային միջոցներ, գյուղտեխնիկա, էլեկտրական սարքավորումներ (ընդհանուր առմամբ 200 անուն ապրանք), այդ թվում՝ երկաթուղային վագոններ և լոկոմոտիվներ, կոնտեյներներ, տուրբիններ, մետաղի և քարի մշակման հաստոցներ, մոնիտորներ, պրոյեկտորներ, հեռակառավարման վահանակներ և շինարարական նյութեր։ Այդ միջոցն անհրաժեշտ է ռուսական շուկայում կայունության ապահովման համար»,- ասվում է հաղորդագրության մեջ։
Այդ ապրանքների արտահանումը ժամանակավորապես սահմանափակված է բոլոր արտասահմանյան երկրներ, բացառությամբ ԵԱՏՄ անդամ պետությունների, Աբխազիայի և Հարավային Օսիայի։ Վերջիններիս նկատամամբ գործելու է արտահանման թույլտվության կարգ, որը հաստատված է կառավարության առանձին որոշմամբ։
Այն ենթադրում է, որ ԵԱՏՄ երկրներ, Աբխազիա և Հարավային Օսիա ապրանքների արտահանման թույլտվությունները տրվելու են գյուղատնտեսության, տրանսպորտի, արդյունաբերության, ֆինանսների և բնապահպանության նախարարությունների միջոցով:
Բացի այդ, կառավարության որոշմամբ ժամանակավորապես սահմանափակվել է նաև Ռուսաստանից անտառանյութի որոշ տեսակների արտահանումը։ Անտառանյութն արգելված է այն պետություններում (կա հաստատված ցանկ, – խմբ.), որոնք ոչ բարեկամական գործողություններ են իրականացրել։ Այդ որոշումը նույնպես կգործի մինչև տարեվերջ։