ԵՐԵՎԱՆ, 9 մարտի – Sputnik. Հռոմում Բելառուսի դեսպանատան վրա հարձակում է տեղի ունեցել։ Բելառուսի արտաքին գործերի նախարարությունը տեղի ունեցածը ահաբեկչություն է որակել։
Հռոմի ոստիկանությունն այսօր հայտնել է, որ անցած գիշեր անհայտ անձինք խոշոր չափի ճայթուկ են պայթեցրել Բելառուսի դեսպանատան տարածքում։
Միջադեպի հետեւանքով դիվանագիտական առաքելության աշխատակիցները չեն տուժել։
Իտալական կողմը հայտարարել է օտարերկրյա հաստատության անվտանգությունն ուժեղացնելու պատրաստակամության մասին։
ՌԻԱ Նովոստին հայտնում է, որ դիմակներով անհայտ անձինք, նախազգուշական միջոցներ կիրառելով, մոտեցել են Բելառուսի դեսպանատան շենքին՝ ձեռքերում պահելով անհայտ առարկաներ։ Այնուհետև այրել են դրանք և գցել դեսպանատան տարածք, որից հետո անմիջապես փախել են դեպքի վայրից։
Բելառուսի ԱԳՆ-ն նաև հայտնել է, որ նետված իրերից մեկը չի պայթել։ Դրա զննության արդյունքում պարզվել է, որ դա վառոդով լցոնված ինքնաշեն պայթուցիկ սարք է։
ԱԳՆ-ի տվյալներով՝ պայթյունը զգալի վնաս է հասցրել դեսպանատան շենքին։ Կոտրվել են հյուպատոսարանի ապակիները, դեֆորմացվել է մետաղական նստարանը, որը պայթյունի ալիքով շպրտվել է շուրջ 1,5 մետր` ցանկապատի վրայով։ Իսկ մետաղական պահարանը 5-7 մետր այն կողմ է շպրտվել։ Տեղահանվել են նաև հյուպատոսարանի շենքի բետոնե սալիկներից մի քանիսը։
Հիշեցնենք, որ ԵՄ–ն ավելի վաղ հայտարարել էր, որ Բելառուսը Ուկրաինայի կոնֆլիկտում «համագրեսոր» երկիր է։