ԵՐԵՎԱՆ, 7 մարտի – Sputnik. Ուկրաինացի ուժայինները երեկ Մարիուպոլում սպանել են չորս խաղաղ բնակչի, ևս հինգին՝ վիրավորել։ Այսօր ճեպազրույցի ժամանակ հայտարարեց ՌԴ պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը։
«Երեկ` Մոսկվայի ժամանակով 17։00-ի սահմանում, Դոնեցկի Հանրապետության զինծառայողները Մարիուպոլի Հաղթանակի պողոտայում բախվել են ուկրաինացի զինված ազգայնականների ստորաբաժանման հետ։ Գրոհայիններն իրենց առջևից տարել են ավելի քան 150 խաղաղ բնակչի՝ որպես «կենդանի վահան» պաշտպանվելով նրանցով» ,-ասել է Կոնաշենկովը:
Հանդիպելով Ազգային միլիցիայի մարտիկներին` ուկրաինացի ուժայինները կրակ են բացել խաղաղ բնակիչների մեջքի հետևից։ Կրակոցներ հետևանքով մարդիկ են մահացել ու վիրավորվել։
Ռուս գեներալի խոսքով՝ ԴԺՀ-ի մարտիկների հաջողվել է Վինոգրադնոյե շրջանով Մարիուպոլից դուրս բերել ազատագրված խաղաղ բնակիչներին և տեղափոխել վերահսկվող տարածք։
«Նրանց անհրաժեշտ օգնություն է ցուցաբերվել»,-նշեց նա։
Կոնաշենկովը հայտնեց, որ մեկ օրվա ընթացքում ԼԺՀ զորքերի խմբավորումը ևս վեց կիլոմետր առաջ է շարժվել և վերահսկողության տակ վերցրել յոթ բնակավայր՝ Սմոլյանինովո, Վոյեվոդովկա, Կրեմեննայա, Կուդրյաշովկա, Բորովենկի, Պուրդովկա, Զամուլովկա:
ԴԺՀ զորքերն իրենց հերթին վերահսկողություն են հաստատել Ազով, Նովոտատարովկա, Միրնոյե բնակավայրերի նկատմամբ:
ՌԴ պաշտպանության նախարարության տվյալներով՝ ռազմական հատուկ գործողության սկզբից ի վեր Ռուսաստանի զինված ուժերը ոչնչացրել են Ուկրաինայի 2396 ռազմական օբյեկտ, այդ թվում` Ուկրաինայի զինված ուժերի կառավարման 82 կետ և կապի հանգույց, ՀՕՊ-ի 119 զենիթային հրթիռային համալիր՝ Ս-300, «Բուկ Մ-1» և «Օսա», ինչպես նաև 76 ռադիոլոկացիոն կայան։
Ոչնչացվել է նաև 827 տանկ և այլ մարտական զրահապատ մեքենաներ, համազարկային կրակի 84 ռեակտիվ համակարգ, 304 դաշտային հրետանու զենք և ականանետ, ռազմական հատուկ ավտոմոբիլային տեխնիկայի 603 միավոր, ինչպես նաև 78 անօդաչու թռչող սարք:
ՌԴ պաշտպանության նախարարության տվյալներով՝ Ռազմատիեզերական ուժերն ու ՀՕՊ-ը խոցել են Ուկրաինայի 14 օդանավ, ուղղաթիռ և դրոն, այդ թվում՝ հարվածային «Բայրաքթար»:
«Երեկ երեկոյան Ռուսաստանի օդատիեզերական ուժերն ու ՀՕՊ զորքերը խոցել են Ուկրաինայի Ռազմաօդային ուժերի ևս երեք Սու-27 Պոլտավայի շրջանում, մեկ Սու-25՝ Գոստոմելի շրջանում, երկու Մի-24 ուղղաթիռ՝ Մակարովի շրջանում, և ութ անօդաչու թռչող սարք, այդ թվում ՝ «Բայրաքթար ՏԲ-2»,-հայտնել է ռուս գեներալը:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել։ Առիթ է դարձել այն, որ ԼԺՀ-ն ու ԴԺՀ-ն օգնության խնդրանքով դիմել են ՌԴ-ին։
Ռուսաստանի և Ուկրաինայի բանակցությունների առաջին փուլը կայացավ փետրվարի 28-ին Բելառուսի Գոմելի մարզում, երկրորդ փուլը` մարտի 3-ին Բրեստի շրջանում:
Այսօր նախատեսված է բանակցությունների երրորդ փուլը։