ԵՐԵՎԱՆ, 7 մարտի – Sputnik. Փետրվարի տվյալներով` վերջին 12 ամիսների ընթացքում պարենային ապրանքների համաշխարհային գներն աճել են ավելի քան 20%-ով։ Այս մասին է վկայում ՄԱԿ-ի Պարենի և գյուղատնտեսության կազմակերպության (FAO) հրապարակած պարենային ապրանքների ամենամսյա գների ինդեքսը։ Վերջին մեկ ամսվա ընթացքում գներն աճել են գրեթե 4%-ով։
Ուկրաինական ճգնաժամի հետևանքներն ավելի ցայտուն կլինեն մարտին, սակայն արդեն փետրվարին դա բերեց արևածաղկի ձեթի գների աճի։ Ձեթի համաշխարհային գներն ընդամենը մեկ ամսում աճել են 8,5%-ով։ Միաժամանակ բարձրացել են նաև արմավենու և սոյայի ձեթի գները (Ինդոնեզիայում և Հարավային Ամերիկայում կանխատեսվող բերքատվության նվազման պատճառով)։
Կաթնամթերքի գներն աճել են 6,4%-ով, քանի որ Արևմտյան Եվրոպայից և Օվկիանիայից փոխադրումները նվազել են, իսկ Մերձավոր Արևելքում պահանջարկը մեծ է:
Նույն պատճառով այս ամիսների ընթացքում հացահատիկի գներն աճել են 3%-ով։ Միևնույն ժամանակ, մսի գները վերջին մեկ ամսվա ընթացքում գրեթե չեն աճել (1,1%-ով)։ Դա պայմանավորված է Օվկիանիայից մատակարարումների ավելացմամբ և Չինաստանից ներմուծման նվազմամբ։
Շաքարավազի գներն ամսվա կտրվածքով նվազել են գրեթե 2%-ով, քանի որ Հնդկաստանում և Թաիլանդում եղեգի առատ բերք է ակնկալվում:
Այնուամենայնիվ, 2022 թվականին FAO-ն չի կանխատեսում ցորենի համաշխարհային դեֆիցիտ։ Թեև ԵՄ-ում և Հյուսիսային Աֆրիկայում բերքը կնվազի (Եվրամիությունում ավելի քիչ, Հյուսիսային Աֆրիկայում ավելի շատ), բայց Հյուսիսային Ամերիկայում և ասիական երկրներում բերքատվությունը բավականին բարձր կլինի, բացի այդ, այնտեղ ավելացել են ցանքատարածությունները։
Եգիպտացորենից ակնկալիքները նույնպես լավ են՝ Բրազիլիան (աշխարհի երրորդ խոշոր արտադրողը) սպասում է ռեկորդային բերքի, իսկ Արգենտինան և Հարավային Աֆրիկան՝ միջինից բարձր բերքի։