ԵՐԵՎԱՆ, 6 մարտի – Sputnik․ Ասկերանի շրջանի Խրամորթ համայնքին հարակից դիրքերում ադրբեջանական կողմը շարունակում է պահպանել լարված մթնոլորտ։ Այսօր առավոտյան էլ հայկական կողմի ուղղությամբ ադրբեջանական դիրքերից ինտենսիվ կրակոցներ են արձակվել։ Տեղեկությունը հայտնում է ԱՀ գլխավոր դատախազությունը Facebook-ի պաշտոնական էջում։
Ադրբեջանական կողմից տարբեր միջոցներով փորձ է արվում խաթարել գյուղի բնականոն կյանքը, գյուղատնտեսական աշխատանքների ընթացքը, խոչընդոտել գյուղական առօրյայի կազմակերպումը։
«Ռազմական ուժի կիրառման սպառնալիքին հոգեբանական ճնշման տեղեկատվական գրոհն ու բարձրախոսներով տարբեր բնույթի հայտարարությունների տարածման տարբերակը հավելելուց հետո այսօր առավոտյան ադրբեջանական կողմը կրկին դիմել է սադրանքի՝ հայկական կողմի ուղղությամբ արձակելով ինտենսիվ կրակոցներ»,- նշված է հաղորդագրության մեջ։
Դատախազության հաղորդմամբ՝ ռուս խաղաղապահ ուժերի օպերատիվ արձագանքի շնորհիվ իրավիճակը հանդարտվել է։
Հիշեցնենք, որ փետրվարի 16-ից սկսած ադրբեջանական կողմը Ասկերանի շրջանի շփման գծի Խրամորթ-Ակնա (Աղդամ) հատվածում մի քանի անգամ խախտել է հրադադարի պահպանման ռեժիմը՝ կրակել դաշտավայրում աշխատող տրակտորիստի ուղղությամբ, այնուհետև հաջորդ օրը գյուղացիներին բանավոր զգուշացրել են լքել տարածքը:
Փետրվարի վերջին օրերին հայտնի դարձավ, որ ադրբեջանցիները բարձրախոսով բնակիչներից պահանջում էին լքել գյուղը՝ հայտարարելով, որ այն ադրբեջանական տարածք է։