ԵՐԵՎԱՆ, 5 մարտի – Sputnik. Ուկրաինայում տեղի ունեցող իրադարձություններն ու Ռուսաստանի նկատմամբ կիրառված պատժամիջոցները էականորեն ազդում են համաշխարհային էկոնոմիկայի և ֆինանսական շուկաների վիճակի վրա, հայտարարել է Արժույթի միջազգային հիմնադրամը։
«Թեև իրավիճակը շատ անկայուն է, և կանխատեսումներ անելը չափազանց դժվարացել է, տնտեսական հետևանքներն արդեն իսկ շատ լուրջ են»,- ասվում է հիմնադրամի հայտարարության մեջ։
Ըստ ԱՄՀ փորձագետների` գնային ցնցումներ կզգացվեն ամբողջ աշխարհում, հատկապես ցածր եկամտաբերություն ունեցող տնային տնտեսություններում, որոնց ծախսերի մեծ մասը կապված է սննդի ու վառելիքի հետ:
«Ռուսաստանի դեմ կիրառված պատժամիջոցները զգալի ազդում են նաև գլոբալ տնտեսության և ֆինանսական շուկաների վրա` անցնելով այլ երկրների վրա», – փաստում է ԱՄՀ–ն` նախազգուշացնելով, որ առավել վտանգված են այն երկրները, որոնք տնտեսական սերտ հարաբերությունների մեջ են ՌԴ–ի կամ Ուկրաինայի հետ։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ռուսաստանի և Ուկրաինայի բանակցությունների առաջին փուլը կայացավ փետրվարի 28-ին Բելառուսի Գոմելի մարզում, երկրորդ փուլը` մարտի 3-ին Բրեստի շրջանում: Բանակցություններից հետո Պետդումայի միջազգային կոմիտեի ղեկավար Լեոնիդ Սլուցկին, որն ընդգրկված է ռուսական պատվիրակության կազմում, հայտարարեց, որ Ռուսաստանի և Ուկրաինայի միջև ձեռք բերված պայմանավորվածություններն առաջիկայում կամրագրվեն բարձր մակարդակով։