ԵՐԵՎԱՆ, 5 մարտի – Sputnik. Մոսկվայի ժամանակով 18.00-ին առաջխաղացման գործողությունները վերսկսվել են, քանի որ ուկրաինական կողմը չի ցանկացել ազդել ազգայնականների վրա կամ երկարացնել «լռության ռեժիմը»։ ՌԻԱ Նովոստիի փոխանցմամբ` տեղեկությունը լրագրողներին է հայտնել է ՌԴ ՊՆ մամուլի խոսնակ, գեներալ-մայոր Իգոր Կոնաշենկովը։
«Ազգայնական գումարտակներն իրենց դիրքերն ամրապնդելու համար օգտվել են «լռության ռեժիմից»,– ասել է Կոնաշենկովը։
Նրա խոսքով` խաղաղ բնակիչները չեն կարողացել դուրս գալ անվտանգության միջանցքներով։
«Այսօր` Մոսկվայի ժամանակով 10.00-ից մինչև 17.00-ն, ուկրաինական կողմի խնդրանքով Մարիուպոլ և Վոլնովախա քաղաքների տարածքում մտցվել էր «լռության ռեժիմ»՝ ռազմական գործողությունների ամբողջական դադարեցմամբ, նշված տարածքներից խաղաղ բնակիչների տարհանումն ապահովելու համար։ Ոչ մի խաղաղ բնակիչ չի կարողացել Մարիուպոլից ու Վոլնովախայից դուրս գալ անվտանգության միջանցքներով»,- ասել է նա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ռուսաստանի և Ուկրաինայի բանակցությունների առաջին փուլը կայացավ փետրվարի 28-ին Բելառուսի Գոմելի մարզում, երկրորդ փուլը` մարտի 3-ին Բրեստի շրջանում: Բանակցություններից հետո Պետդումայի միջազգային կոմիտեի ղեկավար Լեոնիդ Սլուցկին, որն ընդգրկված է ռուսական պատվիրակության կազմում, հայտարարեց, որ Ռուսաստանի և Ուկրաինայի միջև ձեռք բերված պայմանավորվածություններն առաջիկայում կամրագրվեն բարձր մակարդակով։