ԵՐԵՎԱՆ, 5 մարտի – Sputnik. Ռուսաստանի նախագահ Վլադիմիր Պուտինը մտադիր է հեռախոսով զրուցել Թուրքիայի նախագահ Ռեջեփ Թայիփ Էրդողանի հետ: Տեղեկությունը ՌԻԱ Նովոստիին է հայտնել ՌԴ նախագահի մամուլի քարտուղար Դմիտրի Պեսկովը:
«Ծրագրեր կան խոսելու», - ասել է նա:
Թուրքիայի նախագահի պաշտոնական ներկայացուցիչ Իբրահիմ Քալընն իր հերթին ասել է, որ Թուրքիան Ռուսաստանի հետ հաղորդակցության ուղիները բաց պահելու հավանություն է ստացել արևմտյան դաշնակիցներից։
«Միացյալ Նահանգները ՆԱՏՕ-ի մյուս դաշնակիցների հետ սկսեց մի շարք լուրջ տնտեսական պատժամիջոցներ կիրառել Ռուսաստանի դեմ: Մենք արդեն հայտնել ենք մեր դիրքորոշումն այս հարցում (որ Անկարան պատժամիջոցներ չի ծրագրում Ռուսաստանի դեմ. խմբ.): Մենք հատուկ հարաբերություններ ունենք Ռուսաստանի և Ուկրաինայի հետ։ Երկուսն էլ մեր ծովային հարևաններն են։ Կարծում ենք, որ շատ կարևոր է խոսել երկու կողմերի հետ»,–ասել է Քալընը։
Նա նշել է, որ երբ Թուրքիան հարց է տվել, իսկ ո՞վ կխոսի Ռուսաստանի հետ, եթե բոլորը այրեն կամուրջները, արևմտյան դաշնակիցները տվել են իրենց համաձայնությունը, որպեսզի Թուրքիան բաց պահի Ռուսաստանի հետ հաղորդակցության ուղիները, քանի որ դա բոլորի համար շատ կարևոր է։
«Մենք կողմ ենք բանակցությունների շարունակմանը, միջանցքների բացմանը, մարդկանց տարհանմանը, պատերազմի դադարեցմանը»,– Քալընի խոսքը մեջբերում է TRT Haber հեռուստաալիքը։
Թուրքիայի նախագահի պաշտոնական ներկայացուցիչը նաև շեշտել է, որ իրենք այդ հարցի շուրջ կշարունակեն սերտորեն համագործակցել ՆԱՏՕ-ի դաշնակիցների, հարևան երկրների հետ։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ռուսաստանի և Ուկրաինայի բանակցությունների առաջին փուլը կայացավ փետրվարի 28-ին Բելառուսի Գոմելի մարզում, երկրորդ փուլը` մարտի 3-ին Բրեստի շրջանում: Բանակցություններից հետո Պետդումայի միջազգային կոմիտեի ղեկավար Լեոնիդ Սլուցկին, որն ընդգրկված է ռուսական պատվիրակության կազմում, հայտարարեց, որ Ռուսաստանի և Ուկրաինայի միջև ձեռք բերված պայմանավորվածություններն առաջիկայում կամրագրվեն բարձր մակարդակով։