Մարիուպոլի մոտ գտնվող ռումբերի արտադրամասում Թուրքիայի դրոշ է հայտնաբերվել. լուսանկարներ

ԵՐԵՎԱՆ, 5 մարտի – Sputnik. Մարիուպոլի շրջանի Սոպինո ավանում, անօդաչու սարքերի համար արհեստական ռումբերի արտադրության արտադրամասում մի քանի մետր երկարությամբ թուրքական դրոշ է հայտնաբերվել։ Տեղեկությունը հայտնում է ՌԻԱ Նովոստին։

Նշվում է, որ Սոպինո ավանը ժամանակին ազատագրվել է «Աջ սեկտորից» (Ռուսաստանում արգելված է):

«Դատելով, թե ինչ դրոշներ են հայտնաբերվել՝ թուրքական, «Աջ սեկտորի», ենթադրություններ կան, որ նրանք եղել են Թուրքիայից եկած կամավորներ։ Հնարավոր է, որ նախկինում նրանք ԻՊ–ի («Իսլամական պետություն» խմբավորում, որն արգելված է ՌԴ–ում) մասնագետներ են եղել, որոնք զբաղվել են «Աջ սեկտորի» մարտիկների ուսուցմամբ», - ՌԻԱ Նովոստիին ասել է ԴԺՀ ստորաբաժանման մարտիկներից մեկը:

Արհեստանոցը գտնվում է քոթեջներից մեկում։ Այնտեղ հայտնաբերվել են մեծ քանակությամբ պայթուցիկ սարքեր, ինչպես նաև անօդաչու թռչող սարքերի էլեկտրոնային բաղադրիչներ, որոնց օգնությամբ ռումբեր են նետվել, այդ թվում՝ խաղաղ բնակիչների տների վրա:

Ինչպես հայտնել են ԴԺՀ մարտիկները, ավանի բնակիչները բազմիցս տեսել են զինվորական համազգեստով մարդկանց, որոնք ո՛չ ուկրաիներեն են իմացել, ո՛չ էլ ռուսերեն:

Ինչպես հաղորդում է ՌԻԱ Նովոստիի թղթակիցը, զենքի և պայթուցիկ նյութերի արտադրության նմանատիպ արտադրամասեր են հայտնաբերվել նաև հարևան Բերդյանսկոյե գյուղում։ Դատելով սիմվոլներից՝ այս հենակետերում եղել են նեոնացիստներ, այսպես կոչված, «Արջերի» ստորաբաժանումից։

Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։

Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։

Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։

Ռուսաստանի և Ուկրաինայի բանակցությունների առաջին փուլը կայացավ փետրվարի 28-ին Բելառուսի Գոմելի մարզում, երկրորդ փուլը` մարտի 3-ին Բրեստի շրջանում: Բանակցություններից հետո Պետդումայի միջազգային կոմիտեի ղեկավար Լեոնիդ Սլուցկին, որն ընդգրկված է ռուսական պատվիրակության կազմում, հայտարարեց, որ Ռուսաստանի և Ուկրաինայի միջև ձեռք բերված պայմանավորվածություններն առաջիկայում կամրագրվեն բարձր մակարդակով։