Ռուս–ուկրաինական ճգնաժամի ֆոնին Հարավային Կովկասում իրավիճակի սրման շանսը քիչ է. փորձագետ

Ադրբեջանի կողմից սադրանքների իրականացման ռիսկ միշտ էլ կա, բայց եթե այս պահին ադրբեջանցիները ևս մեկ լարվածության կենտրոն ստեղծեն, ապա դա չի բխի Ռուսաստանի շահերից, որի հետ Ադրբեջանը վերջերս ստորագրեց դաշնակցային հարաբերություններ հաստատելու հռչակագիր, Sputnik Արմենիայի հետ զրույցում ասաց ռազմական փորձագետ Նարեկ Ներսիսյանը։

Ըստ նրա` ՌԴ–ն Ուկրաինայում հատուկ ռազմական գործողություն իրականացնելուց առաջ իրեն ապահովագրել է, որպեսզի Հարավային Կովկասում լարվածության նոր կենտրոն չստանա, հետևաբար այս պահին մեր տարածաշրջանում իրավիճակի սրման հավանականություն չկա կամ շատ քիչ է։

Ներսիսյանի կարծիքով` մյուս կողմից Հայաստանը պետք է զգուշորեն գործի, որպեսզի ինքն էլ չհայտնվի պատժամիջոցների տակ, առավել ևս, որ մեր երկիրն ընդհանրապես չունի այդ պատժամիջոցներին ինչ–որ կերպ արձագանքելու ներուժ։ Հետևաբար պետք է այնպիսի գործընկերային հարաբերություններ ստեղծի, որոնք ձեռնտու լինեն նաև Արևմուտքին, իսկ այդ հնարավորությունը Հայաստանն ունի։

Ռազմական փորձագետի դիտարկմամբ` ռուս–ուկրաինական ճգնաժամի համատեքստում ՌԴ–ն առաջին հերթին ձգտում է Ուկրաինան դարձնել չեզոք երկիր, սակայն դժվար է ասել, թե դրա դիմաց Ռուսաստանն ինչ գին կվճարի, որովհետև հավանականությունը մեծ է, որ ճգնաժամը ՌԴ–ի համար կարող է դառնալ «Աֆղանստան–2»։

Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։

Մարտական գործողություններն ընթանում են արդեն 8–րդ օրը։