ԵՐԵՎԱՆ, 4 մարտի - Sputnik. ՆԱՏՕ-ի ԱԳ նախարարների հանդիպմանը քննարկվել է Ուկրաինան ոչ թռիչքային գոտի հայտարարելու հարցը, չնայած որ դաշինքում կարծում են, որ ՆԱՏՕ-ի ինքնաթիռներն ու զորքերը չպետք է լինեն Ուկրաինայում: Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը՝ ամփոփելով դաշինքի անդամ երկրների ԱԳ նախարարների նիստի արդյունքները։
«Դաշնակիցները պատասխանատու են, որպեսզի էսկալացիան դուրս չգա Ուկրաինայի սահմաններից։ Դա կլինի ավելի վտանգավոր, ավելի կործանարար, ավելի տառապալի։ Մենք հստակ հասկացրել ենք`չենք պատրաստվում Ուկրաինայում պատերազմել ինչպես օդում, այնպես էլ ցամաքում», - ասել է Ստոլտենբերգը։
Ինչպես նշել է Ստոլտենբերգը, ՆԱՏՕ-ն նպատակ ունի պահպանել Ռուսաստանի հետ կապի ուղիները, որպեսզի խուսափի կոնֆլիկտային իրավիճակներից:
Նա հավելել է, որ հանդիպման ընթացքում ՆԱՏՕ-ի ԱԳ նախարարները պայմանավորվել են ընդլայնել համագործակցությունը Ֆինլանդիայի և Շվեդիայի հետ: Այդ երկրների ներկայացուցիչները կմասնակցեն դաշինքի բոլոր հանդիպումներին։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններն ընթանում են արդեն 9–րդ օրը։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։