ԵՐԵՎԱՆ, 4 մարտի – Sputnik. Ազգային ժողովի կողմից ՀՀ նախագահ ընտրված Վահագն Խաչատուրյանի երդմնակալության համար ԱԺ հատուկ նիստը կանցկացվի մարտի 13-ին, Կարեն Դեմիրճյանի անվան մարզահամերգային համալիրում: Տեղեկությունը հայտնում է «Արմենպրեսը»։
Նշվում է, որ ՀՀ նախագահի երդմնակալության արարողության համար համալիրում ընթանում են նախապատրաստական աշխատանքներ:
Նախագահի պաշտոնում Խաչատուրյանի թեկնածությունն առաջադրել էր «Քաղաքացիական պայմանագիր» խմբակցությունը:
Հիշեցնենք՝ մարտի 3-ին Հայաստանի Ազգային ժողովը ՀՀ նախագահի պաշտոնում ընտրեց Վահագն Խաչատուրյանին։ Սա նախագահին ընտրելու երկրորդ փորձն էր։ Հարցն այն է, որ ՀՀ նախագահի ընտրության համար առաջին փուլում անհրաժեշտ է 81 ձայն, իսկ իշխող խմբակցությունը 71 պատգամավորով է ներկայացված ԱԺ–ում։ Ընդդիմադիր պատգամավորներն էլ չեն մասնակցել քվեարկությանը։