ԵՐԵՎԱՆ, 4 մարտի– Sputnik. Ուկրաինացի ազգայնականները արևմտյան լրագրողների մասնակցությամբ սադրանք են պատրաստում Խարկովում։ Այսօր հայտնել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը։
«Հաստատված տվյալների համաձայն՝ Կիևի շրջանի Ժիլյարդի փողոցի մասնավոր հատվածում գտնվող տների միջև տեղակայվել են համազարկային կրակի ռեակտիվ համակարգեր։ Տեղի բնակիչներին, այդ թվում՝ երեխաներին, ազգայնականներն արգելում են լքել իրենց տները», - նշել է ռուս գեներալը։
Կոնաշենկովի խոսքով՝ այժմ կայանքները պատրաստականության են բերվել քաղաքից դուրս գտնվող ռուսական զինված ուժերի ստորաբաժանումները գնդակոծելու համար։
Ինչպես նշել է պաշտպանության նախարարության ներկայացուցիչը, սադրանքի նպատակն է, որ ռուսական հրետանին պատասխան կրակ արձակի քաղաքի բնակելի հատվածի ուղղությամբ, տեսախցիկները նկարահանեն և տեսագրությունները փոխանցեն արևմտյան լրագրողներին։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ռուսաստանի և Ուկրաինայի բանակցությունների առաջին փուլը կայացավ փետրվարի 28-ին Բելառուսի Գոմելի մարզում, երկրորդ փուլը` մարտի 3-ին Բրեստի շրջանում: Բանակցություններից հետո Պետդումայի միջազգային կոմիտեի ղեկավար Լեոնիդ Սլուցկին, որն ընդգրկված է ռուսական պատվիրակության կազմում, հայտարարեց, որ Ռուսաստանի և Ուկրաինայի միջև ձեռք բերված պայմանավորվածություններն առաջիկայում կամրագրվեն բարձր մակարդակով։