ԵՐԵՎԱՆ, 3 մարտի – Sputnik․ Ուկրաինայի նախագահ Վլադիմիր Զելենսկին պատրաստ է իր ռուս գործընկեր Վլադիմիր Պուտինի հետ քննարկել բոլոր հարցերը, այդ թվում՝ Դոնեցկի և Լուգանսկի Ժողովրդական Հանրապետությունների (ԴԺՀ և ԼԺՀ) հետ կապված: Այս մասին հայտարարել է Զելենսկին այսօր արտասահմանյան լրատվամիջոցների համար մամուլի ասուլիսի ընթացքում։
«Ես պատրաստ եմ քննարկել բոլոր հարցերը, ես դրանք խորապես հասկանում եմ՝ Ուկրաինայի, մեր լեզվի, ռուսաց լեզվի հետ կապված խնդիրների, Դոնբասի, Դոնբասի կարգավիճակի, ԴԺՀ-ի, ԼԺՀ-ի մասին», - ասել է նա:
Պատասխանելով այն հարցին, թե արդյոք ցանկանում է խոսել Պուտինի հետ, Զելենսկին պատասխանել է, որ ինքը պետք է խոսի նրա հետ։
«Ես պետք է խոսեմ Պուտինի հետ, աշխարհը պետք է խոսի Պուտինի հետ, քանի որ չկա այլ միջոց դադարեցնելու այս պատերազմը»,- նշել է նա։
Ավելի վաղ հաղորդել էինք, որ Զելենսկին Պուտինին առաջարկել է նստել բանակցությունների սեղանի շուրջ։
Հիշեցնենք, որ այսօր Բելառուսի Բրեստի մարզում կայացավ ռուս-ուկրաինական բանակցությունների երկրորդ փուլը։ Կողմերը պայմանավորվել են սեղմ ժամկետներում կապի և փոխգործակցության ուղիներ ստեղծել։ Նաև պայմանավորվածություն է ձեռքբերվել մարդասիրական միջանցքներ ապահովելու մասին՝ դեղորայք, սննդամթերք հասցնելու և տարհանման հնարավորություններ կազմակերպելու համար։
Ռուսական և ուկրաինական կողմերը պայմանավորվել են շարունակել աշխատանքները մոտ ապագայում բանակցությունների երրորդ փուլում։