ՀՀ նախագահ ընտրված Վահագն Խաչատուրյանը որևէ լուրջ գործառույթ չունի, Փաշինյանի սահմանած խաղի կանոններում նա ընդամենն իր վրա պարտավորություն է վերցնելու ներդաշնակորեն համագործակցել իշխանության այլ օղակների հետ։ Sputnik Արմենիայի եթերում նորընտիր նախագահի քաղաքական անձի մասին նման տեսակետ հայտնեց քաղտեխնոլոգ Վիգեն Հակոբյանը։
Նիկոլ Փաշինյանի կադրային քաղաքականությունը, ըստ քաղտեխնոլոգի, երկու հիմնասյուն ունի․ առաջինը՝ անձնական նվիրվածությունն անձամբ Նիկոլ Փաշինյանին, երկրորդը՝ թիմային առումով տվյալ թեկնածուի վստահելի լինելը։
«Այս առումով Վահագն Խաչատուրյանը շատ վաղուց է համագործակցում Նիկոլ Փաշինյանի հետ, դեռ այն ժամանակվանից, երբ Նիկոլ Փաշինյանը որևէ առնչություն չուներ անգամ ՀԱԿ-ի հետ»,-նշեց Հակոբյանը։
Նա նաև կարծում է, որ Վահագն Խաչատուրյանն այս պահին Փաշինյանի կադրային արսենալում եղած ամենաքիչ խոցելի անձն է, քանի որ լրատվական ու քաղաքական դաշտում ոչ այնքան հայտնի է, սակայն, հակառակ կողմից, Հակոբյանի կարծիքով, Խաչատուրյանը քաղաքական առումով համեստ ունակություններ ունի, քանի որ իր կապերը, որոնք ժամանակին ուներ, այլևս արդիական չեն։
Հիշեցնենք՝ մարտի 3-ին Հայաստանի Ազգային ժողովը ՀՀ նախագահի պաշտոնում ընտրեց Վահագն Խաչատուրյանին։ Սա նախագահին ընտրելու երկրորդ փորձն էր։ Հարցն այն է, որ ՀՀ նախագահի ընտրության համար առաջին փուլում անհրաժեշտ է 81 ձայն, իսկ իշխող խմբակցությունը 71 պատգամավորով է ներկայացված ԱԺ–ում։ Ընդդիմադիր պատգամավորներն էլ չեն մասնակցել քվեարկությանը։