ԵՐԵՎԱՆ, 3 մարտի – Sputnik. Միջազգային պարալիմպիկ կոմիտեն (IPC) որոշում է կայացրել ռուսաստանցի և բելառուս մարզիկներին չթույլատրել մասնակցել Պեկինի խաղերին, տեղեկությունը հայտնում է IPC-ի պաշտոնական կայքը:
Երեկ IPC-ն որոշում էր կայացրել, որ Ռուսաստանի և Բելառուսի ազգային հավաքականների մարզիկները Պեկինում կայանալիք պարալիմպիկ խաղերին կմասնակցեն չեզոք կարգավիճակով՝ կապված Ուկրաինայում ստեղծված իրավիճակի հետ։ Նրանց ստացած մրցանակները հաշվի չէին առնվելու մեդալների պաշտոնական աղյուսակում։
Փետրվարի 28-ին, Միջազգային օլիմպիական կոմիտեն (ՄՕԿ) հորդորել էր մարզական ֆեդերացիաներին թույլ չտան ռուսներին և բելառուսներին մասնակցել միջազգային մրցաշարերին։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններն ընթանում են արդեն 8–րդ օրը։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։