ԵՐԵՎԱՆ, 3 մարտի – Sputnik. Նիդեռլանդների թվային տեխնոլոգիաների նախարար Ալեքսանդրա վան Հյուֆելենը Politico պարբերականին տված հարցազրույցում հայտարարել է, որ RT–ի և Sputnik–ի արգելքը ԵՄ–ում պետք է ժամանակավոր լինի։ Նրա խոսքերն է մեջբերում ՌԻԱ Նովոստին։
Ավելի վաղ ԵՄ–ն Ուկրաինայում ապառազմականացմանն ուղղված` Ռուսաստանի գործողությունների ֆոնին արգելել էր նաև RT–ի և Sputnik–ի ազդանշանի և բովանդակության տարածումը։
«Մենք պետք է փորձենք, որ այն (արգելքը,–խմբ.) հնարավորինս կարճ տևի», – նշել է նա։
Վան Հյուֆելենի խոսքով` կարևոր է «առաջիկա օրերի և շաբաթների ընթացքում» վերանայել ՌԴ–ի նկատմամբ կիրառած պատժամիջոցները։
Որպես Ուկրաինայում ՌԴ–ի հատուկ գործողությունների հետ կապված պատժամիջոց` ԵՄ–ում ռուսական մի շարք ԶԼՄ–ների աշխատանքը արգելափակելու մասին կիրակի օրը հայտարարեց Եվրահանձնաժողովի ղեկավար Ուրսուլա ֆոն դեր Լյայենը։ Նրա խոսքով` արգելքի տակ հայտնված ԶԼՄ–ների շարքում են RT–ն, Sputnik–ը և դրանց դուստր կառույցները։ ԵՄ–ի տարածքում TikTok–ում և Instagram–ում արդեն իսկ դադարել են գործել ռուսական այդ լրատվամիջոցների էջերը, իսկ Meta–ն ընդհանուր առմամբ կսահմանափակի դրանց հասանելիությունը ԵՄ տարածքում։
«Ռոսիա սեգոդնյա» ՄՏԳ–ի և RT–ի գլխավոր խմբագիր Մարգարիտա Սիմոնյանը, մեկնաբանելով ռուսական մի շարք ԶԼՄ–ներն արգելափակելու` Եվրահանձնաժողովի մտադրությունը, իր Telegram ալիքում հայտարարել է, որ «կատարվել է լիբերալ Եվրոպայի երազանքը, երկար էին փորձում հասնել RT–ին և՛ Բրիտանիայում Ofcom–ի միջոցով վերահսկելու ու սահմանափակելու, և՛Ֆրանսիայում, ընտրությունների հետ կապված ստերի ու ապատեղեկատվության մեջ մեղադրելով, կեղտ նետելու, և՛ գերմաներենով նոր ալիքի համար խոչընդոտներ ստեղծելու միջոցով»։
Նա ընդգծել է, որ «RT–ի վերաբերյալ այդ որոշումը Ուկրաինայում մարտական գործողությունները դադարեցնելու մասին հայտարարված նպատակների հետ որևէ կապ չունի»։