ԵՐԵՎԱՆ, 3 մարտի – Sputnik. ՀՀ ազգային անվտանգության ծառայության կողմից բացահայտվել է կրթության ոլորտում կոռուպցիոն բնույթի չարաշահումների դեպքեր, հայտնում են ԱԱԾ մամուլի ծառայությունից։
Պարզվել է, որ Երևանի Սուրբ Թերեզայի անվան բժշկական համալսարանի ծառայողները օտարերկրյա քաղաքացիներին ավարտական դիպլոմներ տրամադրելու համար 2020-2021 թվականների ընթացքում անձամբ կամ միջնորդների միջոցով օտարերկրյա քաղաքացիներից յուրաքանչյուրից ստացել են շուրջ 3.000 ԱՄՆ դոլար կաշառք։
Դրանից հետո կազմակերպել են մի շարք ուսանողների տեղափոխությունը օտարերկրյա բարձրագույն ուսումնական հաստատությունների ավարտական կուրսերից Սուրբ Թերեզայի անվան բժշկական համալսարանի ավարտական կուրս։ Արդյունքում կաշառք տված Հնդկաստանի 104 քաղաքացիներ և Բանգլադեշի 1 քաղաքացի ստացել են համալսարանի կողմից կեղծ դիպլոմներ։
Դեպքերի առթիվ ՀՀ քրեական օրենսգրքի համապատասխան հոդվածներով հարուցվել է քրեական գործ, որը նախաքննություն կատարելու համար ուղարկվել է ՀՀ հակակոռուպցիոն կոմիտե:
Նշենք, որ ՀՀ կրթության, գիտության, մշակույթի և սպորտի նախարար Վահրամ Դումանյանի համապատասխան հրամանով դադարեցվել է Սուրբ Թերեզայի անվան բժշկական համալսարանի՝ բակալավրի և մագիստրոսի կրթական ծրագրերով գործունեության լիցենզիաների գործողությունը: Տվյալ համալսարանի ուսանողների կրթության շարունակականության ապահովման նպատակով նրանց հետագա ուսումնառությունը կկազմակերպվի այլ բուհերում: