ԵՐԵՎԱՆ, 2 մարտի - Sputnik. ՌԴ արտգործնախարար Սերգեյ Լավրովը «Ալ-Ջազիրա» հեռուստաալիքին տված հարցազրույցում ասել է, որ Վլադիմիր Զելենսկին «առանց աչքը թարթելու» խախտում էր Մինսկի համաձայնագրերը, Արևմուտքը չէր ուզում Կիևին խելքի բերել։ Նրա խոսքերը մեջբերում է ՌԻԱ Նովոստին։
«Զելենսկին ոչինչ չարեց սեփական ժողովրդի դեմ շարունակվող արյունահեղ պատերազմը կանխելու համար։ Նա, ըստ էության, ստում էր՝ խոստանալով կարգուկանոն հաստատել, երբ Դոնբասի ներկայացուցիչների հետ բազմաթիվ համաձայնագրեր էինք ստորագրում։ Նա առանց աչք թարթելու խախտում է դրանք», - ասել է նախարարը։
Լավրովն ավելացրել է, որ ութ տարի շարունակ ռուսական կողմը փորձել է խղճի խայթ արթնացնել Արևմուտքի մոտ ու «խելքի բերել այդ ռեժիմի կրողներին», որոնք ձեռք են բերել ուլտրածայրահեղական ու նեոնացիստական բոլոր գծերը, սակայն Արևմուտքը ոչինչ չարեց:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները պահանջում են վճռական և անհապաղ գործողություններ։
Ավելի ուշ ՌԴ ՊՆ-ն ընդգծել է, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: