ԵՐԵՎԱՆ, 2 մարտի – Sputnik. ՎՏԲ-Հայաստան բանկը հանդես է եկել հայտարարությամբ և վստահեցրել, որ շարունակում է սպասարկել իր հաճախորդներին` ապահովելով ֆինանսական ծառայությունների բարձր որակ։
Բանկը նաև հայտնում է, որ ՎՏԲ–ի միջոցով կենսաթոշակ ստացող քաղաքացիներին մարտ ամսվա կենսաթոշակը վճարվել է սահմանված ժամկետներում՝ մարտի 2-ին՝ ժամը 18:00-21:00:
Միաժամանակ նշվում է, որ որոշ խնդիրներ կան գումարի կանխիկացման հետ կապված։
«Կանխիկի ստացումը հասանելի չէ Ինեկոբանկ, Յունիբանկ, ՀԱՅԲԻԶՆԵՍԲԱՆԿ և HSBC Բանկ բանկերի բանկոմատներից»,– հայտնում է բանկը` միաժամանակ նշելով, որ քարտապանները կարող են կանխիկ դրամական միջոցներ ստանալ ինչպես ՎՏԲ-Հայաստան բանկի, այնպես էլ ՀՀ մյուս բանկերի բանկոմատներից։
Կանխիկացման համար հաճախորդները կարող են աշխատանքային օրերին դիմել բանկի մասնաճյուղեր։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններն ընթանում են արդեն 7–րդ օրը։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։