Այս պահին ռուսական ՏՏ ընկերությունների աշխատակիցներ կան, որոնք, վախենալով, որ պատժամիջոցների պատճառով աշխատավարձ չեն կարողանա ստանալ կամ այլ խնդիրներ կունենան, իրենց նախաձեռնությամբ փորձում են տեղափոխվել Հայաստան։ ԼՀԿ անդամ Գևորգ Գորգիսյանը, որն այս պահին աշխատում է Հայաստանի ՏՏ ընկերություններից մեկում, Sputnik Արմենիայի հետ զրույցում ասում է, որ լավ կլինի` Հայաստանն այս ուղղությամբ պետական որևէ ծրագիր ներդնի, թե չէ արդեն մրցակիցներ կան։
Գորգիսյանի խոսքով` այս պահին ԵԱՏՄ անդամ որոշ երկրներ պետական ծրագրեր են մշակել արտասահմանյան ՏՏ ընկերություններին առաջարկելու համար։
«Եթե ընկերություններ գան, դա իր հետ ոչ միայն ֆինանսների շարժ, այլև մարդկային ռեսուրս կբերի»,- նկատում է Գորգիսյանը։
Հարցին՝ արդյոք պատժամիջոցների հետ առնչվող ընկերությունների` Հայաստանից աշխատելը մեր երկրի համար խնդիր չի բերի, Գորգիսյանն ասաց, որ որոշ սահմանափակումներ հնարավոր են, բայց չի կարծում, թե խնդիր լինի. դա քաղաքական մասն է, որով քաղաքական պատկան մարմինները պիտի զբաղվեն։
Հիշեցնենք, որ փետրվարի 24-ին Ռուսաստանը հայտարարեց Դոնբասում հատուկ գործողություն սկսելու մասին, ինչից հետո մինչ օրս արևմտյան մի շարք երկրներ ու ընկերություններ տարբեր ոլորտներում, այդ թվում՝ ֆինանսական, տնտեսական, մշակութային, սպորտային, Ռուսաստանի դեմ սահմանափակումներ ու պատժամիջոցներ են կիրառում, որից նաև տուժում է ռուսական ՏՏ շուկան։