Մեր ժողովուրդը ողբալի վիճակում չէր լինի. Տեր–Պետրոսյանն արձագանքել է մտավորականներին

ԵՐԵՎԱՆ, 2 մարտի – Sputnik. ՀՀ առաջին նախագահ Լևոն Տեր–Պետրոսյանն արձագանքել է 8 տասնյակ մտավորականների դիմումին, որով նրանք կոչ էին արել քայլեր ձեռնարկել ղարաբաղյան հակամարտության լուծման գործընթացը վերսկսելու, Արցախի բռնազավթված տարածքները դեօկուպացնելու ուղղությամբ։

Առաջին նախագահը ուղերձի հեղինակ մտավորականներին խորհուրդ է տվել ընթերցել Լեոյի հետ հանդիպման մասին Ավետիք Իսահակյանի հուշերը։

Առաջին նախագահը նաև մեջբերել է Իսահակյանի` 1933թ–ին գրած հուշերը, որտեղ հեղինակը ներկայացնում է Լեոյի հետ զրույցից մի հատված. «Հայության վիշտը ես միայն գերեզմանի մեջ կմոռանամ: Բայց ո՞վ է մեղավորը,-ասում էր նա ինձ,- մենք ենք մեղավորը, մենք՝ մտավորականներս, գործիչներս, դու, ես և բոլոր նրանք: Մեր ժողովուրդը մեղավոր չէ: Այլ մենք, որ այնպես հիմար եղանք, տգետ, որ հավատացինք շահամոլ, դրամատիրական-բուրժուական Եվրոպային, որի համար գաղութների ոչխարների կյանքը ավելի արժեք ունի, քան հայերը, քան փոքր ճնշված ազգերը: Մենք, որ երեխաների պես հավատացինք լուսավոր մարդկության խղճմտանքին, մարդկայնությանը, վաճառվող միջազգային մամուլին, բորենի, շնական դիպլոմատներին… Մենք` պոռոտախոսներս, մեծ խոսողներս, մենք, որ ստեղծեցինք և սնուցինք կուսակցություններ, որոնց մեջ մարմնացավ հայ մտավորականների պոռոտախոսությունը, պարծենկոտությունը և եղեռնական տգիտությունը»։

Հիշեցնենք` այսօր` մարտի 2-ին, մամուլում հրապարակվել էր 80 մտավորականների` ակադեմիկոսների, ԳԱԱ թղթակից անդամների, գիտությունների դոկտորների, թեկնածուների դիմումը՝ ուղղված միջազգային հանրությանը, Մինսկի խմբի համանախագահներին, ինչպես նաև ՀՀ գործադիր ու օրենսդիր իշխանություններին։

Բաց նամակում նրանք կոչ են անում անհապաղ քայլեր ձեռնարկել ղարաբաղյան հակամարտության լուծման գործընթացը վերսկսելու և Արցախի Հանրապետության բռնազավթված տարածքները դեօկուպացնելու, հայրենազրկված քաղաքացիներին իրենց բնակավայրերը վերադարձնելու համար։