ԵՐԵՎԱՆ, 2 մարտի - Sputnik. ԱՄՆ-ն ու ՌԴ-ն պատասխանատու են, որ լարվածությունը «միջուկային անդունդ» չընկնի։ NowThis հարթակին տված հարցազրույցում նման կարծիք է հայտնել ԱՄՆ պետքարտուղար Էնթոնի Բլինկենը: Նրա խոսքը մեջբերում է ՌԻԱ Նովոստին։
«Երկար տարիներ մեծ աշխատանք է արվել, այդ թվում՝ սառը պատերազմի դարաշրջանում, որպեսզի համոզվենք, որ չենք մոտենա միջուկային անդունդին»,– ասել է Բլինկենը։
Նրա խոսքով՝ ԱՄՆ-ի ու Ռուսաստանի պես միջուկային տերությունները պատասխանատու են այն բանի համար, որ լարվածությունը միջուկային զենքի չհասնի։
Բլինկենը նշել է, որ լարվածությունը նվազեցնելու պատասխանատվությունը նաև ռուսական կողմն է կրում։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններն ընթանում են արդեն 7–րդ օրը։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Փետրվարի 28-ին բելառուսա–ուկրաինական սահմանին կայացած բանակցային առաջին հանդիպումից հետո հայտարարություններ եղան այն մասին, որ երկրորդ հանդիպումը կկայանա Լեհաստանի հետ սահմանային հատվածում։