ԵՐԵՎԱՆ, 1 մարտի – Sputnik. Ուկրաինայի նախագահ Վլադիմիր Զելենսկին ամերիկյան CNN-ին տված հարցազրույցում հայտարարել է, որ պատրաստ է ՌԴ նախագահ Վլադիմիր Պուտինի հետ բանակցություններ վարել։
«Աշխարհն արդեն հասկանում է, որ ՌԴ նախագահին անհրաժեշտ է նստեցնել բանակցությունների սեղանի շուրջ, մինչդեռ ես էլ եմ պատրաստ»,– ասել է Զելենսկին։
Միաժամանակ նա հայտարարել է, որ ՌԴ–ի հետ բանակցությունների համար անհրաժեշտ են գոնե ակնարկներ` լիակատար հրադադարի վերաբերյալ:
«Նախ պետք է գոնե ինչ-որ ակնարկներ անել, որ լիակատար հրադադար կլինի։ Չի կարելի բանակցել, երբ ինքնաթիռներ են թռչում ու ռմբակոծում»,- ասել է Զելենսկին։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններ են ընթանում արդեն 6 օր։
Արևմուտքը տնտեսական մեծ պատժամիջոցներ է սահմանել Ռուսաստանի և ՌԴ-ի հայտնի մարդկանց նկատմամբ։