ԵՐԵՎԱՆ, 1 մարտի – Sputnik. Թուրքիան շարունակելու է կիրառել Մոնտրյոյի կոնվենցիայի 19, 20, 21-րդ կետերը, ինչպես արել է մինչ այժմ։ Մոնտրյոյի ստորադասումը և ստատուսքվոյի խախտումը ոչ մեկին օգուտ չի բերի։ Այս մասին լրագրողների հետ զրույցում հայտարարել է Թուրքիայի պաշտպանության նախարար Հուլուսի Աքարը, հայտնում են թուրքական լրատվամիջոցները։
Աքարը նշել է, որ իրենք աշխատում են այս ուղղությամբ և կարծում են, որ շատ ավելի օգտակար կլինի, եթե բոլոր կողմերը ենթարկվեն Մոնտրյոյի կոնվենցիայի դրույթներին։ Նա նաև անդրադարձել է Ռուսաստանի՝ Դոնբասում հատուկ գործողությանը, ևս մեկ անգամ հայտնել Թուրքիայի այն դիրքորոշումը, թե Ռուսաստանի գործողություններն անընդունելի են։
Նշենք, որ Մոնտրյոյի 19, 20, 21-րդ կետերը համապատասխանաբար ենթադրում են. պատերազմի ժամանակ, եթե Թուրքիան պատերազմող կողմերից մեկը չէ, կարող է արգելել պատերազմող երկրների ռազմանավերի անցումը Բոսֆորի ու Դարդանելի նեղուցներով, սակայն այն բացառությամբ, որ պատերազմող կողմերի ռազմանավերը կարող են վերադառնալ իրենց ռազմաբազայի նավահանգիստ։
Եթե Թուրքիան պատերազմող կողմ է, ապա կարող է նեղուցներով ռազմանավերի անցումը կարգավորել ինչպես կցանկանա։ Թուրքիան իրավունք ունի կիրառել նախորդ կետը, եթե կարծում է, որ իր նկատմամբ պատերազմական իրավիճակի վտանգ կա։
Հավելենք, որ մինչ այս Թուրքիայում այդպես էլ հստակ չեն հայտարարել, թե փակում են նեղուցները ուկրաինական կամ ռուսական ռազմանավերի համար։ Թուրքիայի նախագահ Ռեջեփ Թայիփ Էրդողանը, ԱԳՆ Մևլյութ Չավուշօղլուն, այժմ էլ Հուլուսի Աքարը շարունակում են իրենց հայտարարությունը ձևակերպել «շարունակելու ենք հավատարիմ մնալ Մոնտրյոյի կոնվենցիային, ինչպես արել ենք մինչ այժմ» ոճով՝ փորձելով չխաթարել հարաբերությունները թե՛ Ռուսաստանի, թե՛ Ուկրաինայի հետ։