ԵՐԵՎԱՆ, 1 մարտի – Sputnik. ՀՀ տարածքային կառավարման և ենթակառուցվածքների նախարար Գնել Սանոսյանն այսօր ընդունել է Հայաստանում Ճապոնիայի արտակարգ և լիազոր դեսպան Մասանորի Ֆուկուշիմայի գլխավորած պատվիրակությանը, որից հետո դրամաշնորհային պայմանագիր է ստորագրվել, հայտնում են ՏԿԵ մամուլի ծառայությունից։
Մասնավորապես դեսպան Մասանորի Ֆուկուշիման և «Հայաստանի մանուկներ» բարեգործական հիմնադրամի գործադիր տնօրեն Կորյուն Խաչատուրյանը դրամաշնորհային պայմանագիր են ստորագրել։
Ըստ պայմանագրի «Հայաստանի մանուկներ» բարեգործական հիմնադրամին «Լոռու մարզում հասարակական ավտոբուսի տրամադրման ծրագրի» համար «Grassroots Human Security» ծրագրի շրջանակում կտրամադրվի 91,206 ԱՄՆ դոլարի դրամաշնորհային աջակցություն:
«Ծրագրի նպատակն է բարելավել Լոռու մարզում տրանսպորտային ծառայությունների և մարզում մարդկանց, այդ թվում՝ հաշմանդամների կյանքի որակը՝ տրամադրելով հաշմանդամներին հարմար ավտոբուս դեպի Վանաձորը Դսեղին միացնող երթուղին»,–նշված է հաղորդագրության մեջ:
Արդյունքում ավելի քան 5000 մարդ կկարողանա օգտվել ավելի լավ տրանսպորտային ծառայություններից։ Կկառուցվեն կանգառներ, վարորդները կվերապատրաստվեն, իսկ տրանսպորտի շարժին հնարավոր կլինի հետևել բջջային հավելվածի միջոցով։
Հայաստանում Ճապոնիայի արտակարգ և լիազոր դեսպան Մասանորի Ֆուկուշիման և «Հայաստանի մանուկներ» բարեգործական հիմնադրամի գործադիր տնօրեն Կորյուն Խաչատուրյանը դրամաշնորհային պայմանագիր են ստորագրել (1 մարտի, 2022թ). Երևան
Նախարար Սանոսյանը շնորհակալություն է հայտնել Ճապոնիայի կառավարությանն այս տարիների ընթացքում Հայաստանում իրականացրած ծրագրերի համար և հույս հայտնել, որ առաջիկայում էլ բազմաթիվ նման ծրագրեր կիրականացվեն։
Նախարարն ու դեսպանը երկուստեք բարձր են գնահատել Հայաստանի և Ճապոնիայի միջև առկա համագործակցութունը տարբեր ոլորտներում։