ԵՐԵՎԱՆ, 1 մարտի - Sputnik. Ուկրաինան կարող է կանխարգելիչ հրթիռային հարված հասցնել Բելառուսին։ Տեղեկությունը «Ուկրաինա 24» հեռուստաալիքի եթերում հայտնել է Ուկրաինայի Ազգային անվտանգության և պաշտպանության խորհրդի քարտուղար Ալեքսեյ Դանիլովը, նրա խոսքը մեջբերում է Sputnik Բելառուսը։
«Մեր զորքերը ոչնչացնում են այն տեխնիկան ու ռեսուրսները, որոնք գտնվում են մեր երկրում։ Բայց եթե մեր գլխավոր հրամանատարը որոշում կայացնի, ապա դա կարվի», - հայտարարել է Դանիլովը։
Հարցին, թե արդյո՞ք Ուկրաինան կանխարգելիչ հարված կհասցնի Բելառուսին Ուկրաինայի նախագահ, գերագույն գլխավոր հրամանատար Վլադիմիր Զելենսկու կողմից նման որոշում կայացնելու դեպքում, Դանիլովը պատասխանել է. «Բնականաբար»։
Մինչդեռ Պենտագոնում բելառուսական զորքերն Ուկրաինա ուղարկելու նշաններ չեն տեսնում։
Երեկ՝ փետրվարի 28-ին, Բելառուսի տարածքում կայացել են ռուս-ուկրաինական բանակցությունները խաղաղ կարգավորման վերաբերյալ։ Մոտ ժամանակներս կկայանա բանակցությունների երկրորդ փուլը, որը նույնպես տեղի կունենա Բելառուսում:
Պաշտպանության նախարարության մամուլի ծառայությունից արդեն հերքել են լուրերն այն մասին, որ բելառուս զինվորականները գտնվում են Կիևի ու Չերնիգովի մոտակայքում:
Գերատեսչությունում հավաստիացրել են, որ բոլոր բելառուս զինծառայողները գտնվում են հանրապետության տարածքում մշտական տեղակայման կետերում ու չեն մասնակցում Դոնբասում ռուսական հատուկ գործողությանը:
Նմանատիպ հայտարարություններ է արել նաև երկրի նախագահ Ալեքսանդր Լուկաշենկոն։ Այսօր նա հերթական անգամ ասել է, որ բելառուսական բանակը ռազմական գործողություններին ոչ մի մասնակցություն չի ունեցել ու չի ունենում: