ԵՐԵՎԱՆ, 1 մարտի – Sputnik. Եվրոպայի հայերի միությունն ու Ուկրաինայի հայերի միությունը Ուկրաինայում ՀՀ դեսպանության հետ մշտական կապի մեջ են ՀՀ քաղաքացիների հետ, հայտնում են Եվրոպայի հայերի միության գրասենյակից։ Տեղեկացվում է, որ նրանք աշխատում են հումանիտար օգնություն ցուցաբերել` ապահովելով Ուկրաինայում մնացած ՀՀ քաղաքացիների դուրսբերումը և տեղակայումը Եվրոպայում։
«Խնդրում ենք հաշվի առնել, որ ԵՀՄ-ը կարող է աջակցել միայն Ուկրաինայի սահմանից դուրս։ Այդ իսկ պատճառով նախևառաջ հորդորում ենք դիմել տեղական ինքնակառավարման մարմիններին երկրից դուրսբերումը կազմակերպելու համար»,–ասված է հաղորդագրության մեջ։
Միությունից Ուկրաինայում գտնվող ՀՀ քաղաքացիների համար տրամադրել են հեռախոսահամարներ, որոնցով կարող են զանգահարել և իրենց գտնվելու վայրի վերաբերյալ և այլ անհրաժեշտ տեղեկություններ տրամադրել։ Դրանք են`
+380442349005
+380671090506
+380689602524
+380685000782
«Ուկրաինայի սահմանը հատելուց հետո արդեն մեր կազմակերպությունը կաջակցի մեր հայրենակիցներին»,–ասված է հաղորդագրության մեջ։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
ՌԴ Պաշտպանության նախարարության հաղորդագրության համաձայն՝ ռուսական զինված ուժերը խոցել են Ուկրաինայի ռազմական ենթակառուցվածքի 1325 օբյեկտ, այդ թվում՝ 43 կառավարման կետ և կապի հանգույց: Ոչնչացվել է 395 տանկ և այլ մարտական զրահամեքենաներ, համազարկային կրակի 59 ռեակտիվ համակարգ, դաշտային հրետանու և ականանետերի 179 հրանոթ: